K’chang K’bä Tumat-ah Kia vai Phäh
K’chang k’bä tumat-ah kia vai phäh bi vai gui lah m’lung ng’ngaih gui ak’da om ci.
K’chang k’bä gui cuh ami ghün yah-ung ng’yu ba ca m’lung, m’hngi ca m’lung gui-awn ak’cum-ah ng’pyang ng’tham ci gui-ah k’chang gui-ah kia ci. A k’se-ung ka noh ak’ni täng-ah, ak’ni-ung ka noh ak’ni pi täng-ah ng’hlat u neh hma kat nak gui cuh m’hngi nak-ah m’lung-awn m’shi k’pyo hnging ci gui-ah k’chang gui-ah kia ci gui. Ghün om nak-ung phih ni ci gui cuh läk neh bi ci gui-ah kia ci.
K’chang k’bä St. Augustine cuh lam k’ni kä hnguh pha-ung kat nak gui akhak leng leng bi ca k’chang tuamt-a kia te ci. Cung phih cang ca lam cuh hnguh lo neh kä ni ca lam cuh nong ghüt neh cang ca lam m’düng neh läk neh tah k’chang k’bä tumat-ah kia lo ci. Hlu läk ng’shä St. Paul cun phih ak’cang cuh hle-ah ng’ngai neh hle cuh ak’cang-ah a ng’ngaih yah-ung yumtu ng’bum cuh duk k’dei na neh ng’lei m’hlo te ca kia ci. Cung phih cang ci cuh ahmat lo kon-ah aghün om nak pum cuh cang ci täng-ah m’hlat neh pyang tham ci. A kat nak gui cuh nong ghüt ci.
K’chang cuh kat bi hloi ca hngun k’ghüng tumat-ah kia ci. Cun-ah kat nak gui cuh ng’dawit neh ng’pyang ng’tham ba neh ng’yu ba hnging-ung k’chang k’ni k’chang k’bä-ah kia tu hnging-ah kia ci. K’chang k’bä gui cuh kat nak-ung ami luh täi hleih let lo ba neh ak’cum-ah ng’däi tho ba ci gui-ah kia ci. Ng’yu ba ci nak-ung kong-ah kiah, k’hlam-ah miktui-ah hlo-ah kiah nak gui cuh ng’yu ba nak-ah miktui-ah kä kia ci. Ca puma-ung kong lah k’hlam-ah akia-ung hla ani loh thai-ah ani puk poi ani m’neh yah-ung vah ani miktui ng’kia lo ci kia ci. Mät-ah kat nak-ah phäh ng’yu nak ba-ung kat-ah phäh-ah thüi tu k’cang neh m’lung thüi tu k’cang neh ng’yu ba vai cuh hlü ci.
K’chang k’bä gui cuh ami kat nak-ah phäh-ah ami ng’yu ba cuh kä ng’shot ci gui. Shih nak cuh i-ah-ung phih lo hnging ci ci neh a k’cum-ah hti theing khai-ah ng’pyang ng’tham ci gui-ah kia ci. A cun-ah kia neh ami shih vai, shih nak-awn ami ng’bui vai cuh kä kiü ba ci gui. Ngami gui cuh kat nak ami bi vai-ah tah ami shih vai vah ng’ya hlü ci gui. Kho m’dek khan-ah ashäng hta om vai, Khanmopi-ah ng’dün hleih om vai cuh hnguh u neh kat nak gui cuh hloi ci gui. K’chang k’bä Goliet cuh kum (167) yah-ung yumtu ng’bum gui cuh läk neh ami ngon sheh yah-ung ami pha tu. Netah ayum-ah Khanpughü cuh ami plah hlak ak’she-ah ami pyein hlak, cunte Goliet noh ka kho kum 86 pum-ung Khanpughü noh hngät phih ak’se-ah kä na ci man ci kä plah hnging khai, a hngei kho ng’yo gui phih kä m’tam, kä m’hlüng m’tai hnging khai ci hleih ngon ci gui. Cun-ah hlo-ah bä ca k’chang gui cuh ami yum äp-ah Khanpughü cuh ami m’lung kyong-ah ka noh m’hngi tu k’cang u neh ayum am’hngi gui vai-ah hti theing hting ling neh om ci gui. Cun gui cuh k’chang k’ni k’chang k’bä gui-ah kia lo ci gui.
Hting ling neh chüi kha ca k’chang gui phung cuh k’chang k’bä gui-ah kia tu hnging u hlä.
