A M’lung M’däm Ci Noh Bawi Maak Ci
Jew Pa k’khui ng’bum gui-ah kia ca Pharisees, Saddusees,Ng’thu k’shümgui,Essenes gui, Zealots gui, Herudian gui noh k’phyon ca Bawi ca i hlok cha Bawi-ah a kia vai ci cuh k’bäi u neh ami yum nak gui thum cuh om man ci. K’phyon ca Bawi cuh ngami gui-ung-ah tumat ku ku-ah kia chin ci ci neh ng’ngai ci gui. Cunte Bawi Yeisu cuh ngami gui-ung-ah tumat-awn phih kä täng tu ci.
Bawi Yeisu cuh ngami gui-ah tah nga k’shui gui, lo lai mah gui, k’kyong khui mah gui-awn ng’hnguh neh ng’hta ng’ko neh a ng’nam nep na gui ci. A mi hta k’hmo gui m’hngi gui neh puma gui phih m’thei m’kam tu gui ci. Bawi Yeisu cuh kat mah gui-awn ei ghawm neh om ät ci. Cun gui cuh Jew gui noh hnguh dam u neh kä yei nak ci gui. Bawi noh cäi cat vai gui k’hmuh gui hleih phih ngami Bawi cuh k’phyon ca Bawi ci neh kä yum ci gui. Khanpughü noh alam hngei-awn k’phyon ca Bawi cuh tüi lo ca akia-ah mong cuh do lak hnging vai-ah yum nak cuh hlü ci.
Bawi Yeisu noh shi hla Secramentu-awn ng’pak hleih “Kei cuh Khanmopi-ah kyum lo ca hngun ei-ah ka kia ci.Shin ei tu ci gui cuh hngun ng’dün ghün nak gah khai gui. Shin-ah kho m’dek-ah phäh ka peit cuh kei-ah hla nei” ci neh pyein lo hleih ani yum tu te ci gui cun noh phih nong lo ghüt ci gui. K’chang a k’da noh k’chang hngei tumat-ah kyä hla ei cuh kat nak-awn be ci ci neh ng’ngai u neh hteh ta ci gui.
Jew pa k’khui khawng mang k’chang gui noh Bawi cuh kä mi teng ba thei bäng-ah kä kia hleih kä yei lo na va ci gui. Moses-ah m’thei m’cäi gui kä läk tu ci ci neh Pharisees gui noh ng’ngai ci gui. Yeisu noh k’chang gui ami ng’ngaih ng’peng neh kä mi ng’gei vai-ah pong püi ci ci neh Saddusees gui noh hnguh ci gui. Bawi Yeisu noh thuuk ca m’thei m’cäi gui k’phlan nak-ung kä ng’ge püi gui-ah pyein u neh ng’thu m’cäi k’shüm gui noh phih u ci gui. Bawi cuh a i ng’bum a u ka vai-ah phih ng’düi ca kä kia neh ami kat nak gui cuh pyein lo pe gui ci. Bawi Yeisu noh Pharisees gui-am a k’pung täng-ah kyawm neh ak’kyong-ah she khak ca thung bawk-awn hlup-ah ng’cim hngüm lung vai hlü-ah pyein neh m’täng gui ci.
Jew pa khui gui noh ng’büh ng’mang khoh k’cham mah cuh Khanpughü-ah yei nak, du khaih nak cuh Khanpughü noh kat mah-ah kia hleih tan apeit ci neh yum ci gui. Cunte Bawi noh ng’büh ng’mang k’chang gui Khanmopi-ah ami gok vai-ah tah kalauk m’shi ng’pyün k’hngai-ung m’hluh ei vah yä tu ba khai ci neh pyein na gui ci. Khanpughü noh du dawng ci gui lah yai ca thü hlei ci gui m’hngi pi gui ca akia-ah mong cuh m’thei m’thang ci.
Yum nak-ung khawng mang ci gui noh Bawi Yeisu a ng’ming thang neh a tai lo vai cuh kä ng’ya hlü ci gui. Cunte a k’da noh Bawi cuh läk tu u neh a pyein-ah ci-ah ng’ngai tu ci gui. Ng’thu m’cäi k’shüm gui lah Pharisees gui noh Bawi cuh thuuk ci gui noh Khanpughü-ah m’thei m’cäi gui-awn ng’peng ca ng’thu pyein hla lo müi khai ci neh ng’shi u hleih phih cang ci gui cuh m’thein gui cheng geng ci.
Bawi-ah ga gui cuh Bawi noh cäi cat vai gui a k’khak leng leng m’dang gui hleih phih k’phyon ca Bawi ci neh kä yum ci gui. Ngami noh Bawi ami yum tu vai hlü-ung ami kat nak gui-ah phäh ng’yu ba khai gui hlü. Ngami cuh ami m’lung m’däm ci gui-ah kia neh Bawi cuh maa u neh ng’lung na neh ngon vai neh pong htei ci gui.
