Bä ciah Daniel Comboni ah ghünlu a mòng
Italy ghunkhaw Verona ung om ciah duyai k’chàng gùi ka a mi k’hmon ah kyawng tumat ung ca ng’thei ciah kyawng hta k’hmo tumat cu Africa kho ung ka no chü ne do ciah kya ci. A cun ah kyawng ung bi bi ciah Director cu Africa a mòng gui cu yum ciah kya ne a kyawng hta gui am a cun ah mòng m’thein tu gui hti ciah kya ci. A kyawng hta gui no a ni am Boi Phaya Congo ci ne a mi yei nak m’dang ne a mi chü ah kya ci. A cun gui ah phä ah phih a ni ah m’lung k’nga ung bi hlü gui om lo ne Daniel Combni cu Africa ung hteit Khanpughi ah mòng lam gui thähla m’thei m’thang khai ah a ghünlu gänap ciah kya ci. Christu kum 1849 ung a ni cu ng’thu lam gui ung hnguh hmat nak, Sei lam ung hnguh hmat nak lah Khanpughi lam hnguh hmat nak gui cu leng ne ng’thei ng’thang lo ciah kya ci.
Taigü Boi ah a kya lo kon ah Christu kum 1857 ung Daniel cu a hei Boiphaya k’hma awn Africa ah hteit ci gui ah kya ci. Tui lam awn hteit u ne Sudan ah Mânggo k’däm ah kya ciah Khartoum ung a mi gok vai ah k’cha k’phli peng peng sho ciah kya ci. A ni ah bi loh vai gui cu a kya ah bong bai nak ah bi loh gui ah kya khai ci cu k’shing lo ciah kya ci. K’phan k’chàng hlùmhlèi k’chang gui ah phäh ah Afica k’pakkhui k’chàng gui cu Uyopa pakkhui k’chàng gui kä ng’ngaih gep ci gui ah kya ci. Africa ah coi ne oh ci ah hngu ah om ne Khanpughi ah mòng lam bi vai ah vuuk hnguh vai ah bi lo ne kya hleih a k’tha khen lo ne a shäng shäng bongbai lo ciah kya ci. A ni no ng’toi püi ne bi bi a bi püi gui ah Boiphaya gui cun phih shi lo gäk gäk ci gui ah kya ci. Daniel no a nu pa k’tu am a guk nak ah ca ung “kei mi gui a van cu bi bi vai, m’hngu lah shi m’hlon vail ah shi vai ah phäh ah Khanpughi no a na chü thäm gui ah kya ci.
Cun tu pang ah phih a mi nong düt ah ng’müi m’cha lah Boi Yesu m’hngi nak awn kei mi gui cu bi ka mi bi ci lah ka mi shi ciah kya ci ci ah ka mi yum nak awn m’hteng ne ka mi bi ciah kya ci. Africa ah Khokum goi Khanpughi ah bi a bi kon ah kä gai lo ne Italy kho ah htei ba ciah kya hleih a ni ah bi hlü, a ng’ngahtüh gui man kä ng’päng hlot ciah kya ci. Cun tu pang ah phih Daniel cu a ni ah bü ceng man gui k’däih ne a bi vai ah phäh ah ngui m’cun khai ah ng’ngai ne Uyopa pum ung hteit ghüi ciah kya ci. Africa taik cu Africa Pakkhui k’chang gui awn ng’thonghlat ne yumtu k’chang ah a mi kya lo vai ng’yak hlü ne k’phan k’chang gui a mi yoih gui kä om ein ba vai ah k’tha na ne bi bi ciah kya ci. A ni cu Africa tai kung k’chüit vei hteit ne ngami gui no Khanpughi ah bi a mi bi hnging vai ah bi loh gui a peit gui ah kya ci. A ni cu a kya ah a m’hngi yei nak gui ah Khartoum pakkhui k’chang gui ah hngu ah shi ciah kya ci.
