Mi mi ah Citputi Nu Maria

Mi mi ah Citputi Nu Maria poi cu Christu kum 1571 ung a k’hma nak Pius no letpanto Mânggo  ung Pinle tui lam ng’tuk nak shüm ba vai ah phäh ah leng ne a bi lo ah kya ci. Tach pappk’ui k’chang gui no a mi uk ah Christian tui lam gak’kap ah a mi awng tang nak cu ng’lami hta Maria ah gunhtot nak kon awng tang ciah kya ci. A ni ah gunhtot nak cu hteitheing ciah citputi ung ka no leng ne gah ah kya ci. A kya ah m’nai vai ah kya ciah thûm gui teng ah a kya ung a cun ah kyom htang ni ciah k’taigü nak cu Bä ciah Dominic am Nu Maria no m’dang ne a pyein ah kya ci.

Salan nanpat gui awn tang ciah Ave Maria myeita a ng’lung 150 cu a cun yah ung ca k’khei ci no a í ci ne kä hmat man ciah kya ci. Ave Maria a k’htük nak cu Bä ciah luka no a guk ah ng’thu k’ni ung ka a mi lak ah kya ne a Ave Maria myeita a k’hngih nak cu caä thûm gui ung ka la ne m’don ne a mi pyan ah kya ci. Thuk ciah mong 15 ah kya ciah Yeitu vai thuuk ciah mong, thüi hleih vai ah thuuk ciah a mong, cäicat vai ah thuuk ciah a mong gui cu a k’tung pi ah Nu Maria lah Boi Yesu ah ghünlu a mong m’dang ne a mi pyan ah kya ci. A k’chuk nak Papa Shangpughang Polu no a cun ah thuuk ciah mong gui a k’ni ah kä ng’ngahtüh ne a hngun kä om ciah k’chang awn täng ci ci ne pyein ciah kya ci.

Italy ghun khaw , Loreto Mânggo ung om ciah Phaya kyawng ah a mi lak ah Litany gui cu Christu kum 1592 ung citputi k’khei lo täi m’don ne k’khei ah kya ci. citputi gha k’khei täi hleih “Aw.. Yesu khei mi gui ah kat nak cu na k’pyhon tu gui ä” ci cu Christu kum 1917 ung Fatima Mânggo ung Nu Maria no k’chang shing k’thum am m’dang ne a m’thei tu gui ah kya ci. Myeita tu mat leng leng ba ne m’cu cu na m’dam ci ah ng’ngaih ah phäh ah ng’yum m’hngih ci gui no leng leng ba ne ka ning m’hngi ci a mi ci cu a k’cum ah ng’yak hlü ah hlo ah kya ci ci cu a cun ah myeita no na m’thei gui ciah kya ci. Htitheing ciah citputi cu m’hngih nak m’dang ciah kya ci.