Khanhtapup a ng’vai gui a mòng

Ng’müi m’cha bang om ciah Khanhtapup gui cu kho m’dek kä om pha yah ge ung hlüngtai pi ci ah Khanpughi no a tüi pyan gui ah kya ci. Ngami gui cu a mi kyä kä om ne shih nak kä om ein ciah ng’müi m’cha gui ah kya ci. Ngami gui ah ng’ming cu a mi bi loh nak awn Khanpughi ah ka no a mi gah ah kya ci. Khanpughi awn tang ci ci ne a ming gah ciah Michael cu kho k’nget lah a shek’ka gui tuk nak ung bi ne Khanpughi ah aanaa gut khai ah pong ciah luciphe yeikyai nak ung ka no a k’täm vai ah k’phan k’chang ah kya ci. A cun kon ah Khanmopi ah ng’tukkho om lo ci. Michael ah po Khanhtapup gui no shok k’phyu nu cu ng’tuk püi ci gui. Shok k’pyhu nu lah a K’khanhtapup gui no phih ng’tuk tub a püi ci gui. Cun ung phih kä ng’näng u ne Khankho ah a mi om nak tub a vai kä om ba ci. (Mik hnghuh 12:7-8). Michael cu mi mi gui a k’hngüp täi hleih a k’shek k’kaa awn mi ng’tuk ah nak ung a k’cum ah nag hung m’htei gui ciah kya ci. A cun ah k’chang gui kat hlak ne m’dí gui ciah Khok’she cun phih pupikong lah a k’hmüt m’dang ciah k’cengshä ah a k’she ah omnak yanmei k’däi ung k’htop ci gui. Ngami gui cu yaica gein vai lä khai gui ci ne Mikhngu hung a mi m’dang ah kya ci.

Khanhtapup Gabriel ( Khanpughi ah m’yungaa) cu Khanpughi ah däm ciah m’yungaa thähla m’läng m’kang nak ung bi ciah kya ci. A ni cu ng’lami hta Maria am Boi Yesu a ng’tüi lo vai m’thein ciah kya ci. Ng’lamihta Maria no a ni cu ng’lami ah kya ci ci a mong pyein hleih Khanhtapup Gabriel no Khanpughi no kä ci hnging a í ka om ci ci ne (Luka 1:37) ung m’shang ba ciah kya ci. Gabriel cu Khanpughi ah ng’thu thähla m’thei m’thang ci gui ghung m’htei gui ciah Khanhtapup ah kya ne a mi ng’ngaih u nak kä om ba ne yaica buiawt yah ung na gunghtot gui ciah kya ci. Khanhtpup Raphael (Khanpughi ah htamadaw) cu kyä lah ng’müi m’cha lam ka gai gong ci gui m’htei m’hta gui khai ah bi bi ciah kya ci. A ni cu Tobiah ah hteh nak lam pum m’thei ne tobiah ah a k’chumah mü phih kho k’she ung ka no ghung m’htei ciah kya ci. Tobiah a mik a hnguh ba vai ah phih ci ba pe ciah kya ci. A ni cu kya ci gui a cang ah m’dang ne Tobiah am kei cu Khanpughi ah maa ah mai gah ne Khanhtapup gui k’chü ung ka tumat ah kya ciah Raphael ah ka kya ci ci ne pyein ciah kya ci.