khawh k’chàm-awn ng’büh ng’mãng hlü cuh a k’sé gùi phùng-ah ng’tün pong nák-ah kia ci.

Báwi Jesu Christu nawh a m’thei-ah ng’thu k’ní cuh, hngí-hngá neh kä zùm ci-ah k’chàng nawh k’síng neh kä hmat ci-ah kia ci.  A m’lùng m’däm ci-ah kia neh kä k’síng kä hmat lawpi khai-ah kia ci. Cun-ah k’chàng cuh ng’vók ghüh, kat piàng neh a hei gùi m’dí gùi neh vam-néngnák, a m’lùng ng’ngaih, i-ah kä mawng law bà hleih càng ci-ah mawng lam awn, a ng’lat-ah ng’thu ng’htà lawman ci. Khãnpùghí lam-ah, gäng tham neh bi-loh gùi cuh ng’büh ng’mãngnák vai ci-ah ng’ngài lawman ci. A cun-a hlaw-ah k’chàng gùi cuh na k’khén gùi vai néi. Ng’Khái neh péit ták vai-ah, ci hlü-ah a kia-ung, ng’mãng k’chàmnák vai phih kia te ci. Cun ung phih, sin-ah khaw m’dek ’khãn-ah mi law zah ung mi züng-ah mi lawte ci. Mi hteh law bà ung phih, mi züng bä-ah mi hteit bà khai-ah mi hmat ci. Cun-ah kia hleih ei vai, hlui vai, a k’om bäng-awn ng’büh vai-ah kia ci. Ng’Mãng k’chàm hlü ci-ah k’chàng gùi cuh kat vai lam-ung päng hti ci gùi. Cun-ah k’chàng gùi cuh, ava chüt-ah dí maih zop man ci gùi. I-ah kia hleih ci-ung khawh k’chàm-awn ng’büh ng’mãng hlü cuh a k’sé gùi phùng-ah ng’tün pong nák-ah kia ci. k’Chàng m’sah gùi cuh ng’mãng k’chàmnák vai-ah ngùi ng’zák hlü aih u nehtah ami zùmnák, nawng man ci gùi. Ngami gùi cuh, ami m’lùng ung zái-cãnák nawh m’dí gùi hleih gein-vai man ci gùi. Na mät läí cuh Khãnpùghí-ah ning k’chàng-ah kia neh cun-ah kat gùi cuh, na k’khén vai néi. Ng’Súng hngéinák, zùmnák, Khãnpùghí lam-ah gäng neh k’thá-phiat nák, m’lùng sònnák, hngip hngäi nák, cun gùi-awn na ng’mãng k’chàm vai-ah na k’thá-nák vai néi. Khãnpùghí nawh, a ning chü zah-ung k’chàng gùi-ah ami ning hnguh ng’záknák ung a ng’dáng-ah, na ng’gùn te ci-ah kia neh na zùmnák, khäng-htek hleih na k’pán vai néi. Cun-ung vah, a ng’däih-ah ghinnák cuh, na gah khai.