Shing m’kang k’tung a nän nak ah Poi
A yan k’chang gui ah kat nak ah phä ah a mi yai ca nak hlak lah shih nak ah ng’phlan ciah Shing m’kang k’tung cu Boi Yesu ung ka no yeikyai ne kai nak ka k’hlak kyum ah kya lo ci. Bä caih Polu no a guk nak ah a k’htük nak Corinhtu 1: 23-24 ung “ Mimi gui cu shing m’kang k’tung khan ah shih ciah na k’pyhon gui ciah Boi Yesu a mòng gui thähla ne mi m’thei m’thang ci. A cun ah mòng cu Judeu gui no ng’kyoh ci ah hngu u hkeih a k’khuihei gui no ta gugak ah hngu ci gui. Greek lah Judea a u phih chü gui pyi ah phäh läi Christu cu Khanpughi ah k’thagui lah thukshim k’chuh ah kya ci. Luka 9: 23 ung “Tumat ku no na läk hlü ciah a kya ung a mät no a mät ma ne a kut lam l’tung k’kot ne na läk hlä” ci ne Boi Yesu no pyeinci. Shing m’kang a nän nak ah poi cu Chrisyu kum 629 ung a mi hnguh ba ah htithein g ciah üm nak ne shüm vai a ng’kho ung leng ciah kya ci. Boi Yesu ku k’kyong ah a mi phuh kon ah Boi Yesu ah shi nak ah shing m’kang k’tung cu a hlülä gui no kä mi hnguh ein vai ah m’ghong ung ghot ne ta lung k’po nu gui awn a mi geih ta ah kya ci.
Christu kum 326 ung Maha Constantine Shangpughang ah a nu Helena no a cun ah shing m’kang k’tung cu hngu ne ta htitheing ciah phaya kyawng tumat ung a hlim ah kya ci. Christu kum 614 ung Pashang k’chang gui no Palestine hteit ne a mi tuk yah ung a cun ah shing m’kang k’tung cu a mi hteh püi ah kya ci. Christu kum 629 ung Constantinoble Mang im shangpughang Helarclitus no Pashang k’pakkhui k’chang gui m’chüt gui ne htitheing ciah shing m’kang k’tung cu Jerusalem ah a hteh ba püi ah kya ci. A ni cu a cun ah shing m’kang k’tung a mät no k’kot hlü tu lang pang hleih phih Mânggo m’kot ung a gok yah ung a k’kyong ah kä lut hnging ciah kya ci. A hngeit ah om ciah Patria Zachri no shangpughang ah mâng hlüi hlak lah Boi Yesu ah shih nak ah shing m’kang cu kä ng’awi ci ci ne k’nga k’phlang hleih Shangpughang no a ni ah hlui ah mâng hlui gui hlut ne phih awn a mi tah ah hlui hlui ne a k’koh ba kon ah shing m’kang k’tung cu a yan a mi hlim nak man ung a mi hlim ba ah kya ci.
