Bä caih Peter Claver ah ghünlu a mòng
Bä caih Peter Claver Christu kum 1581 ung Spain ghunkhaw, Padu Mânggo ung ng’tüi ciah kya ci. A ni cu ghunkho a k’thai gui ung Khanpughi ah mong lam thähla m’thei m’thang hlü ciah a m’lung k’nga om hleih a khokum 20 ung Jesuit ng’htoi un glut tu ciah kya ci. A cun ung ka no kho kum a pi sho lo hleih Colunmbia ghunkho Cartagena Mânggo ung a m’tüih ah kya ci. A cun ah Mânggo ung Taigü Mâng ah kya lo tu ciah kya ci. A cun ung ka no Khanpughi ah mong lam cu Africa ung ka no k’phan k’chang ah kya ne bi bi khai ah guhkho k’thai ghunkho gui ung duyai k’chang Nakroes gui ka vai a mät no a mät gänap ne gunhtot gui ci. A mät no a mät Nagroes gui ah k’phan k’chang ci ne ngami gui am Khanpughi ah mòng lam gui kä m’thei m’thang gui pha ung a mi ei ok vai lah sei gui cu maa ne peit gui ciah kya ci. Taigü khem Boiphaya am phih a ni no a pyein cu “ Mi mi gui cu duyai k’chang gui am m’gong awn kä ng’hta püi gui pha ung kut awn maa ni ng’hta püi gui vai ci ne pyein ci. A cun yah ung lumlei k’chang gui no a mi yoih tuk vai gui a k’daa be khai ah a mi m’tok nak ah hnguh ah k’phan k’chang gui kä hngün hngok ein thei khai ah det gui ne phan gui u ne ta a kya man ah kä mi m’ei m’ok gui ne a kya ah ghatghom ciah biloh gui phan gui u hleih a m’shah cu a cun ung vah shi ci gui ah kya ci. a hngun ghüng ba ne k’poih ba ci gui tui k’kam ah va gok ne a mi teihpüi ah kya ciah cu Peter Claver bäng vah hnguh ci gui ah kya ci.
A ni ah ghünlu pum ung k’phan k’chang gui 300,000 khei ci cu m’shi nak Sacramentu a peit gui ah kya ci. A ni cu kho k’hngüp äp ung Nayi m’chin 15 kat k’pyhon nak bi peit gui ciah kya ci. Phaya kyawng bäng ah kä kya hleih a mi yoih tuk nak gui yung ah phih Khanpughi ah mong lam thähla m’thei m’thang ciah kya ci. A ni cu Cartagena Mânggo ung om ciah thong khui k’om gui ah ng’müi m’cha lam ka vai phih a k’ni ah bi peit gui ciah kya ci. A cun ung bi a bi yah ung a ni ah ng’müi cha lam ah gunhtot nak kä om hleih a mi ngon gui ah k’chang gui cu ni hleih kä om ciah kya ci. Peter Claver cu a ni ah ghünlu a k’hngu lam ah ka gui a kya duyai khai ah ng’päng hlak ne Christu kum 1654 ung a u no phih kä tä tub a ah shi ciah kya ci. A ni a ghün yah ung a pyein ah k’chü m’kha cu “ kei läi laa tumat ah om k’ih a hlo vah ka thei bang tu hlü ci. A ni cu laa ah kya ciah kya hleih a í ung phih thüihlei nompang ne kä kyat u ci. A cun ah kya hleih Khanpughi ah k’phan k’chang cu a cun ah hlo ah a kya vai hlü ci” ci ne pyein ciah kya ci
