Nu Maria ah ng’tüi nak k’hngüp

Nu Maria cu Galilee khaw, Nazareth Mânggo hta ung a Nu Anna lah a Pa Juachim no a ni hta nak ah kya ci. Bä ciah Juachim lah Anna cu a k’hmo Khanpughi no kä pe tu goi hnging khai ah ng’ngai ni ne kyat e ci goi. Cun tu pang ah phih ngani ah k’taigü cu Khanpughi no ng’ngai ne, Na k’pyhon gui ciah Boi Jesu ah Nu ah kya lo k’khai ah Maria cu a ni hta k’hngumi ah kya lo khai ah pe goi ciah kya ci. Nu Maria ah a ng’tüi nak ah poi cu Jerusalem ung maa ne a mi bi ah kya ci. Christu kum 687 ung Papa Shangpughang ah kutu ng kho m’dek pum a van ung yat hleih Nu Maria ah poi cu a mi bi lo ah kya ci. Nu Maria ah poi cu December k’cha 8 ung bi ah kat nak kä om ein hleih a kyümah nak ah poi awn k’cha k’ko peng oeng ng’lak nak ciah kya ci. Kat nak kä om ein hleih kyämah ciah Nu Maria ah hta gui lah yumtu ng’bum ung om ciah a ng’htoi phäh phäh gui no phih ngami gui ah m’hngi nak cu Nu Maria am a mi gänap ci cu a mi m’dang vai ah yum nak ung ng’gun ne a mi ghünlu ung k‘tha nak ci gui ah kya ci. Nu Maria cu a kya ah a kyom htang nak, Pa Khanpughia h a pyein a ng’ngaih nak lah Muh htitheng awn a be nak ah phä Khanpughi ah kya lo khai ah a mi ghü ah kya ci. Nu Maria cu Kho m’dek khan ah om ciah kat mah mi mi k’chang gui awn kä tang ein ne htitheing ne Khanpughi ah bä khäk nak awn be ng’tüi lo ciah ng’lami hta ah kya ci.

Nu Maria cu a k’she k’ka ah toktap nak ah k’kaa ah gok ciah k’chang k’hngumi Eve ung ka no k’chang gui ah yeikyai nak gui maih tu lang pang man hleih phih a k’she k’kaa k’pyhu ah luk’ke leh khai ah a hei k’hngumi tumat cu ah kya ciah Nu Maria cu kho m’dek khan ah Khanpughi no tüi lo khai ci ah a mong cu ( Gen 3:15) ung om ciah kya ci. A cun ah Khanpughi ah k’chü khan man te cu Nu Maria a ng’tüi lo yah ung ng’kyüm be ciah kya ci. Khanpughi ah mik ung a ni cu htitheing nak ung hlüngtai tu pi ne khanhta pup gui awn täng ciah kya ci.