Jesu nawh a k’gàw gùi m’gái gùi ci.

Jesu Cã-gat-ung-kah lut lo neh Simon-ah k’piú-ah lut ci. Simon-ah k’chú-ah nú cuh, k’hmat ci. Ani kavai-ah Báwi cuh, ng’huinák ci gùi. Báwi nawh a pèi-ah ng’düí neh k’hmatnák cuh, be hleih k’hmatnák nawh chah hleih a k’tén-ah let lo neh ’chin na gùi ci. Khàw ava luh vü zah ung a hei hei-ah gaw-pàinák om ci gùi phung, Báwi-ah lo püi u hleih Báwi nawh phih, tumat täì-ah ’khãn-ah akut taih hleih ami gàw-pàinák gùi maih zop ci.Khaw-’nget gùi nawh phih, “Nang cuh Khãnpùghí-ah ning htá-ah na kia ci,” ci neh m’lã u neh a k’dá ung-kah lut lo ci gùi. Báwi nawh phih, ngami cuh, k’sé na gùi neh Christù-ah a kia cuh, hmat ci gùi-ah kia hleih kä mi piéin-èin vai-ah m’htíng gùi ci.  Khàw thai lo hleih a dìngnák-ah hteit ci. K’Chàng ng’bum gùi nawh phih, Jesu cuh, sùi u neh a omnák-ah chüt hleih lo u neh ngami-a kah, kä hteh-èin vai-ah, cho ci gùi.  Jesu nawh “A hei pigò gùi-a phih, zèi tu vai-ah màwng ka piéin vai-ah kia ci. A cun vai-ah a na tüih lo-ah kia ci,” ci neh piéin ci. Judea khàw púm, cã-gat gùi-ung m’thei m’cäi neh om ci.

Bawi noh a pa Khanpughi ah abi vai gui da tu lang pang hleih phih a k’taigü vai cuh kä hmih ci ah kya ci. K’chang gui m’gai va gui ci, kho-nget k’täm ci, a bi vai da ci. cun tu pang nga phih k’chang gui kä mi om nak a hteit neh a mät hta k’taigü ci. Mikmi ah ghün om tu nak ung phih mi shüm ba vai cuh a i a mäih ah a da ung phih mi k’taigü vai kä k’hmih en vai hlü ci ci cuh mi shüm ba ko.