Bä ciah Gregory ah ghinlu a mòng
A ng’vai pi Papa Shangpughang gui ung tumat ah kya tu ciah Bä ciah Gregory cu Christu kum 504 ung Roma ghunkhaw Patrian k’kyawng k’khui ung ka no ng’tüi lo ciah kya ci. A khokum 35 ung a biloh gui a kya ah aungtang ne a cun ung ka no kho kum k’hma sho lo hleih a sham gui ah a khoh tang gui nong ne Taigü Boi tumat ah kya lo tu ci. Christu kum 590 ung Gregory cu Taigü khem (Deacon )tumat ah kya ne bi a bi tu yah ung k’chang gui a k’daa no yum m’nai u ne a mi ng’shan ah phäh ah Papa Shangpughang ah kya lo ci. A ni cu a cun ah Mânggo ung ka no dong khai ah pong hleih phih St. Peter phaya kyawng ah khah püi ne pikhtik a mi peit ah kya ci. A cun ung ka no Gregory cu Khanpughi ah bi kä ng’düm ein ne bi len ne bi ne Maha Poih gah ciah kya ci. A ni cu thong k’kyum gui a m’hlot nak ba gui vail ah duyai k’chang gui a gunghtot nak gui vai ah yumtu ng’bum ung nga ne k’poih lo ciah ngui gui cu mang ciah kya ci. Roma inpaya a dí kon ah Barbarian pakk’khui k’chang gui ah kut ung ka no ghunkho k’chang gui ghung ciah kya ci. K’taigü nak gui ung Gregorian ng’äi gui leng ne mang ne England kho ah Khanpughi ah mònglam thähla m’thei m’thang khai ah k’chang gui tüi ciah kya ci. A ng’büh mang khotang gui kä tenge in ne a mät no a mät Khanpughi ah täkphan ci ne chü caih kya ci. A ni ah hngu läk ci gui cu a cun ah poih awn k’däih ne bi bi ciah kya ci.
Leiget gui a maih vai ci ne ah kat nak gui ah phä ng’yu ba ne ng’tän ne a mi hteh yah ung Hadian ku Phaya kyawng ah k’khan ung Khanhtapup Mikael no k’khìm im ung k’khìm ghon ba hleih a hnguh ah m’dang ciah kya ci. Khanpughi no kat nak ah phä ah buiawt vai gui hmaih ne ng’päng ci ci cu a m’dang ah kya ci. Khanpughia ah k’chü m’gein nak, bäkhäk nak ah phäh ah a cun ah phayakyawng ah khan ah khanhtapup ah gup cu pyang ne a mi m’düih ah kya ci. Thûm teng ung Gregory ah Yahteih tumat ah kya ciah Justuh cu ng’müi m’cha k’pyhon nak vai ah Missa gänap 30 vei a ng’däih ah gänap ne a kya ah yaica nak ung ka no phong ciah kya ci ne a teihpüi tumat am m’dang man ciah kya ci. Bä caih Gregory cu Christu kum 604 ung Roma Mânggo ung shih ciah kya ci.
