Ng’shüm Nak Hmat Nak
K’chang hngei-ah mong hmat ci cuh pyinnya k’tat kya neh amät noh amät hmat ci cuh hnguh hmat ca k’chang-ah kia ci. Boi Yeisu noh a pyein cuh na k’pat mik ui noh aning kat hlak-ung cun-ah mik ui cuh k’pät neh na ghoh vai. Na kyä pum-ah m’htei kho-ah na gok-ei k’dam kut kho kä ng’kyüm hleih na om cuh bä tuba khai. Cun-ah hlo-ah na pat kut nh aning kat nak hlak-ung tupit neh na ghoh vai. Kut kho ng’kyüm hleih m’htei kho-ah na hteh-ei k’dam akdut k’pit-ah na ghün cuh ni tu ba khai. (Mt 5:29-30)
Na mät noh na mät na hmat vai ci cuh van noh ng’ya tumat khai. Cun-ah k’chü cuh pyein vai ayät-ah hlo-ah bi vai cuh kä yäk ci.I kya hleiih ci-ung cun-ah hngu-ah ng’shüm nak ci cuh om ci. Cun cuh bi shüm nak läk shüm nak gui kä om-ung mät oh mät hmat nak cuh kä om hnging khai kia ci. Tumat ku bi lo-ung i-ng ka bi, ng’ngah tüh nak aluh lo-ung i-ang ka ng’ngah tüh yah ci gui neh mät noh mät cuh ak’cum-ah ng’ngaih na neh ng’shüm neh om vai hlü ci.
Hnguh hmat ca k’chang tumat noh apyein cuh k’chü m’kha ät hta kä na pyein pha-ung k’thum vei na ng’ngaih tüh cang vai. I kia hleih ci-ung kä pyein pha-ung ng’ngah tüh cuh pyein kon, bi kon-ah ng’yu ba-ah bä tuba ca kia ci.Poi k’kyong-ah kah avan lut lo khai-ah pyein lo phleng phleng-ung k’chang hngei gui noh kyä kä gai cuh na hmat lo tu khai gui-ah kia ci. K’chü m’kha tumat om ci. Cun cuh na hmat na bi vai, na bi na hmat vai ci-ah ng’shüm hmat nak kä om-ung mät noh mät i bi hmat vai kä ng’hloi-ah hlo-ah bi chin gui cun phih phloi khai kia ci. Boi Yeisu noh shing m’kang k’khan-ah ang’bah yah-ung ani tu that neh ngon m’shih ci gui-ah k’chang k’nget gui-am “Ngnami noh kä hmat neh ami bi nei m’gein tu gui-ä.” ci neh apyein cuh tuh ngoi güt chüt hleih ng’ngah tüh vai ni ca k’chü m’kha tumat-ah kia ci. Cun-ah hlo-ah mikmi-ah ghün om nak-ung phih ak’ni vai k’tha na neh bi-ung phih kä hmat ca, mät-ah tah hnguh hmat nak kyen tu ba ca k’chang m’shah noh ana ng’shuk chak lo-ung cun nak k’chü m’kha cuh shüm ba neh k’tha lak ba vai kia ci.
Boi yeisu noh apyein nak-ung mong goi lo hning ci. Ma neh tumat cuh k’chang k’ngon gui noh Boi yeisu cuh khanpughü-ah kä hmat neh ami duk dei nak, ami tuk thah nak-ah phih kya hnging ci. A hngih nak-ung k’chang k’ngon gui noh ngami-ah bi cuh ni ci-ang ka ci-ang cuh kä mi hmat-ah phih kia hnging ci. Cung phih ami duk dei nak-ah Boi Yeisu noh ak’ni lam täng-ah ng’ngaih pe gui ca mong cuh mi hmuh hnging ca kia ci. A k’hngih nak-ung ka ng’ngah tüh ba-ung k’chang tu that neh m’lei m’hlo nak cuh ni ca ma mong kä kya-ah mong cuh lei cuh hmat hnging ci gui. Cung phih hmat nak cuh a hmu-ah phäh kia ci.
Ng’yak hlü lah hmat nak cuh ng’toi ge lei-ung ni tuba ci. Ng’yak hlü cuh ma neh hmat nak cuh a hngu lo-ung ng’yu nak ba noh cuh läk lo ge ca kia ci. Ng’shüm nak hamt nak gui kä om-ung mei-awn kä ng’shü neh k’hngüp khui-ah m’tham neh hteit ca k’chang-awn täng ca kia ci.
