Kchòkhò ung RC ah nglêilehnak
Lung KshéBòiphàyà cuh Kkhòilung ah cagat ung a ngtàngnak khngüp kphlì shô chütah Lung Kshé a kah hlukì Pùghí Tam Nglò noh Kkhòilung ung a i ah kya ci gui hteit neh mthêin ci. Lung Kshé Tam Nglò noh Kkhóilung ung na om vai khò gui noh kä mi yùm ung Lung Kshé ah mä na om hnging khai ang ciah Bóiphàyà Audrain ngshi ci. Pùghí Tam Nglò no kei ung im khngih om ci.Na yùm ah na htùng mang ung gah khai ci hleih acun ung aktén ah Bóiphàyà Audrain noh yùm neh mäng kphlì nglak na ca Lung Kshé ah ngläk lo tu neh Pùghí Tam Nglò ah péit ah im ung om tu ci.Bóiphàyà Audrain cuh hmóngcàng yáicâ nak gui akdá hngu tu pang láng neh phih Kkhânpùghí ah pongpüî biloh cuh ani on a täng ah om ci ciah a yùm nak on Kkhânpùghí shüm hmat neh yèikyài neh om tu ci. Cun yah ung Lung Kshé cuh imtûng 40 phlän ca pìgò kdäm tumat ah kya ci.Akhngú ah ék gâi ni,mêi kló ni ah phäh ah imtûng 16 bäng kpoih ba ca pìgò htâ ah nglat ci.
Bóiphàyà Audrain cuh aktén ah bi bi hlü te ci cuh Lung Kshé ah a gok lah June kchâ phlän ca kya neh pìgò ktû cuh lô ah ngplôn neh kä ngshông neh ami kya ah phäh ah a ngngaih ah htahtana bi kä bi hlot ci.Pìgò ktû cun phih ami pìgò ah gok lo ci no pit kyokyatkyat hleih kä htangkhâ ca akchî kä ngngài hlot ci gui. A cun ah kya chütah khòhtûi a ngpäng a gin ah kphêi ah ngdükhò kchàng gui ah Kchò kchî akní ah a ngthêi tu vai lah ami thùngyò gui akní ah a hmat vai ngthêingthàng vai ah ngngài lo ci. Mângtat ung kpoih ghüt ca Bóiphàyà Alexis lah tamah saya gui cun phih ashängshäng hteit neh teng ba gui htî ci. Bòiphàyà Audrain cuh a phéilàng ah om ca pìgò gui ah a nghlôi tä hleih a hteh ah phäh ah kchàng akdá on nggèi ngkhot lo ci gui.A im htá tumat lah a im ung htùng mang ah a pí htá lah a eî ók gui cuh dúkhaih tu kcàng ci.
Khò k’hlô mà ah Yeinanchaung ung akshô bi bi man ca Bóiphàyà Audrain cuh a kya ah m’yu neh kkhîng kkhap ca Kchòkhò mhtûng ah ngplôn neh htahtana bi a bi ah phäh ah a kyä hlá ah gáigongnak plohkheih lo ci. A kya ah khmatmcâi lo hleih phih kuh màn tu khai u kä om ci. Pìgò ktû cuh nglut neh gôigê lo ca Bóiphàyà Audrain hngu u netah a kya ah ng’ä ngcäí lo ci gui. A ngyüvü ah ami pígò ah ghunkhò hei ah ka kchàng a shih tu ung ghunkhò uk ci noh a mkat lo gui vai kyi u netah pìgò ktû gui no Bóiphàyà Audrain cuh pìgò kpùng ah ngkhah püî neh bung kpyü htà ah thà ghüt ci gui. A gái lo ba kòn ah vah pìgò kpùng ah kpyü tumat ung a. gok hmat lo ci.Cun ah ngdü hngün cuh dó neh tûikcüih nghngók gui dá ca khòmdek ah kya ci.Akhngú ah a cun ah khò bung ät khleih neh khäng neh om lo ci. A cun ah nì mòng lam on Kkhânpùghí ah ngyák hlü ah täng ah Lung Kshé cuh Catholic htahtana ah ngdü hngün akhngú ah aktúng ah ngshùng ngshet nak ah kya lo ci. Akhngih vei nak ah khòmdek púm yat hleih ami ngtuk nak om lo hleih Mângtat ung om ca htahtana bi bi ci gui cun phih Lung Kshé ah lo neh ngthup ci gui.
Ngami cuh uyin bi neh khòlô tu u neh om tu ci gui.A tuhkbäih phih Mângtat púi ung lèng neh a ghunkhò púm yat hleih ngtuk nak ung Mangtat ung om ca Bóiphàyà mamah gui cun phih Lung Kshé,Khòilung,Kshíthmòi ah ngthup lo ba ci gui. A ngkyìng k’hlùi on ngtuk ci gui ami lêim lo ung mtùimhleih pe ca Saya,Sayamah gui ami om a ngkyìng k’hlùi noh hmat neh Khòilung pìgò ngbûm cuh Kkhân k’yòng ni,hlehnget kdäm ni on mdí khai pong hleih phih Bóiphàyà Shé Ngthàng ngshä laih laih hleih phyòng bà htî ci. Pahta kchàng gui cun phih akya ah suhshàng ktàigü laih laih u neh ayan Kkhânpùghí noh a mhtéi ah hlo ah a mhtéi ba vai nghûingpâ gäkgäk u hleih a cun ah ci ah na mgêin bà gui khenggeng ci.Acun gui cuh teng ung Lung Kshé Parish,Kkhòilung pìgò ngbûm cuh Kchòkhò ung Kkhânpùghí noh mà kbäih neh a ghü htük yùm ci ktû pahta kchàng gui ah ngshùng ngshetnak ami ûpâ ah Bói ah shîhlá pûmkyä mät ah ngpûngngtâi nak ah Sacramentu ah om nak cuh htá kcü nà ngshòn noh phih yùmmnài mtâmmkhah tu lä khai kya ci.
