Bä ciah Margaret Ward ah ghünlu a mòng
Bä ciah Margaret Ward cu Christu kum 1550 ung England ghunkhaw, Congleton, Cheshire ung ng’tüi ciah kya ci. A ni cu England ghunkhaw ung phan k’chang tumat ah kya ne bi bi ciah kya ci. A ni cu k’chang ah hmai phih kä tenge in ne a ming k’she thang ciah Boiphaya tumat ah kya ciah William Watson ah phan k’chang ah kya ci. Boiphaya William Watson cu thong khui k’kyawng lah a k’pung yung ah ghunkhaw mong gui ng’hngu k’tuk püi caih k’chang ci ne k’puk u ne ei kä m’ei ein ne shi chä ci ch chüt hlei a mi nong ah kya ci. Kho k’hngät ung Taigü Boi William Watson cu England khaw ah k’taigü ne a mi ng’bum nak ung a kai tu vai ah a mi chüthäm tu ah kya ci. A cun ung Margaret no ei ok gui a m’khäh nak ah k’bahkhop hta heh püi ne a cun ah Boiphaya cu hteit ne hngu ciah kya ci. A cun ah Boiphaya William Watson cu a pei ah ka gui awn ng’hmat lo tu ne ng’ngaih gep vai ah kya lo chüta Margaret no gúi a ng’shäi nu tumat dümhta ah lo püi ne Boiphaya am a thak lo ah kya ci. Cun ung ka no Catholic htinbo hta gui a m’shah ng’vat ne ta k’chang gui a mi ih shi hnging ah mü ng’lung khocoih ung a om nak ah pyatinpok m’kot ah k’kaa ah om ciah tui nu pei ah ka no ng’hlek’ko awn a ät vai ah Margaret no m’cäi güt caih kya ci.
Boipahaya cu gúi k’hngih ah m’chep ne ta pyatinpok ung ka no k’kaa ah yu kyum hleih a kut vang lah a kho vang cu hnget ciah kya ci. Htinpo hta gui no shui ne hnguh lo u ne a mi thuh ah kya ci. Margaret lah Iris k’chang k’pami hta cu Boipahaya William a lot vai ah hluihlak gui m’thon tu ni ne gunghtot tu ci goi ah kya ci. A cun ung ka no kä shop ha hleih ng ani cu a mi pha goi ah kya ci. Margaret cu thong khui k’om a hei gui awn a täng ah a kya ah a mi kalu kak ah kya ci. A ni cu kho k’hngüp k’chüih peng peng m’shi gúi awn chit ne a mi ci ah kya ci. Taya yung ung a mi ng’shik’ca vai kä mi khapúi pha ung a kut ung gúi awn chit ne bat ne ta a kya ah a mi tukthah ah kya ci. ghunkho Mang gui no Margaret lah John cu ghunkho htitsaphok ci ne a mi puk goi ah kya ci. Ngami no a k’hngih nak Shangpinu elizabeth am Englican phaya kyawng ah phaya ka ni m’shuukchuk tu khai ci ne a ni ng’shang vai ah pyein u hleih Margaret no Shangpi nu ah khan ah ka nak a pi hta phih kä ka bi man ci ci ne m’shan ba gui ci. Christu kum 1588 ung ngani cu a ni k’hngügon ung m’chünpit ne a mi ngon goi ah kya ci.
