Bawi Jesu noh Pharisees gui tam gui ci
Nami dí lo khai néi, nangmí k’chü m’cäi k’süm, Pharisee, ve-kha k’chàng gùi! Nangmí nawh k’chàng gùi-ah mà-ah Khãmòpí m’kot nami khai ci. A i-ah kia hleih ci ung nami mät phih kä nami lut ci. Lut hlü ci phih nami kioh ci. Nami dí lo khai néi, nangmí k’chü m’cäi k’süm, Pharisee, ve-kha k’chàng gùi! A i-ah kia hleih ci ung lä-ah k’tài-gü pe gùi nehtah hmeinú-ah khawh nami èi pe gùi ci. Cun-ah phäh-ah, kapí ci-ah, m’cha m’langnák nami gah khai.
Nami dí lo khai néi, nangmí k’chü m’cäi k’süm, Pharisee, ve-kha k’chàng gùi! A i-ah kia hleih ci ung nami zùmnák läk tu khai tumat nami gah vai-ah Tui-núli ’kat neh khàw-ng’zùng khum neh nami hteit ci. Tumat kù nami zùm tu hlak kon-ah, ani cuh, nangmi-ah mä a goi-ah hngá hleih se pí neh m’htèi lam-ah nami m’hteh ci. Nami dí lo khai néi lam m’süm k’chàng mik m’dah gùi! Nangmi nawh nami piéin cuh, “Khàw-im awn ng’phiun ung i-ah kä kia-khai. Khàw-im ah ghùi awn ng’phiun ung ghùi nawh kiuk khai nami ci ci. K’Chàng k’sé, k’chàng m’dah gùi aw, a i ang abä tu bà? Ghùi ang? Ghùi m’htí m’théing ci-ah Khàw-im ang?Cun kon-ah, Khàw ’kiak-awn ng’phiùn-ung, i-ah kä kia khai. Khàw’kiak ’khãn-ah om ci-ah, khawih-hngahnák-awn ng’phiùn-ung läk vai-ah kia khai nami ci ci. Amik m’dah gùi aw, a i ang abä tu bà? Khawih-hngahnák ang? Khawih-hngahnák m’htí m’théing ci-ah Khàw’kiak ang? Cun-ah kia hleih Khàw’kiak-awn ng’phiùn ci cuh, Khaw ’kiak-ung lèng neh khàw’kiak ’khãn-ah om ci phung-awn ng’gun ci. Khàw-im awn ng’phiùn ci nawh phih, Khàw-im ni, Khàw-im ’kiong-ah om ci mät, ng’ming k’pha neh ng’phiùn ci. Khãnmòpí-awn ng’phiùn ci cun phih, Khãnpùghí ah ngohnák ni, A cun-ung ngoh ci mät ni-awn ng’phiùn ci.
Pharisees gui cuh a mi pyein na ci ah kä om u hleih Bawi noh a beit gui ah kya ci. K’chang gui noh ami yum vai ami ngak gui vai ah phäh a läk ci gui ah kya ci. Cun a kya hleih Bawi noh ami m’lung a k’ni ah ami pyan vai ng’yak hlü neh a tam gui a kya ci.
