Bä ciah Pius ah ghinlu a mòng
Boi Yesu ah a shi lah a hla Sacramentu m’shümk’chuk ne üm m’nai ciah a k’chüih nak Papa Shangpughang Pius cu Christu kum 1835 ung venis Mânggo pei ung om ciah lai bi ci gui ah k’kyawng khui ung ka no ng’tüi lo ciah kya ci. Taigü Boi ah a kya kon ah kä ng’düm ein ne Khanpughi ah mong lam gui a bi nak awn a ng’ming thang ciah kya ci. Christu kum 1884 ung Manduva ung Taigü Mâng ah kya lo ne a cun ung kho kum k’chüüt om ne ta vinies Mânggo Taigü ng’vai ah kya lo ci. Christu kum 1903 ung a ni cu Papa Shangpughang ah kya lo khai ah a mi ghü cu a van ah phäh ah cäicat nak vai ah kya ci. A ni cu hnguh hmat nak gui ung phih kyai, ng’shä bang ng’hta ng’ko nak ah ng’kho ung phih kyai a í kä om tu ciah kya ci. A ni cu Khanpughi ah k’chang tumat düt ah kya ci. A ni no a k’koh ah k’chü m’kha cu “Boi Yesu ung a van a k’thai ah kya vai” ci cu a k’cum ah läk ne k’taigü nak gui ung a van a k’thai ah kya khai ah m’thang hlat ne, ng’thu k’ni gui k’khei ne hnguh hmat nak ah mong lam gui cun bi a k’nni ah pyangtham ne bi lo ciah kya ci.
Yumtu k’hmo kl’chang gui am khokum 7-14 yah ung Boi Yesu ah a shi lah a hla ei ok tu hlak vail ah a cun ah Boi ah a shi lah hla cu a shäng shäng ei ok vai ah a m’thei m’cäi gui ah phäh ah a ni cu Boi ah a shi lah a hla ah Sacramentu ah Papa Shangpughang (Pope of the Eucharist) ci ne a ng’ming thang ciah kya ci. Papa Shangpughang Pius cu Yumtu ng’bum ah Khanpughi ah mong lam bi ciah ng’htoi cun phih hlüngtai khai ah ci ne lang hta ne ng’shung hngei ciah a mi m’thei m’thang vai ah Boi Phaya gui k’nga k’phlang gui ciah kya ci. Papa Shangpughang ah khung yung ung a mi bi gui cu a kya ah ng’awt ne kya hleih a ni no a pyein cu Boi Yeisu Gesmani ng’vong k’kyawng ah a mi pha vai hlü ah ga k’kap gui am a mi na k’bui hlat ci ne m’thein tu ciah kya ci. Austria Hangry k’pak khui k’chang gui ah a mi Shangpughang no ng’tuk khai gui ah a ga k’kap gui am kongkyi a peit gui vai ah ng’hui na hleih, Papa Shangpughang no kei cu ng’tukah nak vai ah kä kya ne dímkyäp nak vah kongkyi ka pe ci ci ne pyein ci. Christu kum 1904 a k’htük pi ah ng’tukah nak ng’päng hleih a cun ung ka no kä shop ha hleih Papa Shangpughang Pius cu shih ciah kya ci. A shi lo vai ung a guk ah ca ung “kei cu a k’du k’khaih ah ka ng’tüi lo ciah kya hleih a k’du k’khai ah ka ghing ci. A cun ah kya hleih a k’duk’khaih ah vah ka shih khai ci ne guk ghüt ciah kya ci.
