Bä ciah John Eudes ah ghünlu a mòng
Boi Yesu ah ghui m’lung ah phan ah k’chang ah kya ciah Bä ciah John Eudes cu Christu kum 1601 ung Pyinhtit khaw ah ng’tüi ci. A nu lah Pa ah pyein ng’hngu tuk püi ne Pari Mânggo ung om ciah (Congregation of the Oratory) ng’htoi ung lut tu ciah kya ci. A cun ung a k’ni ah k’tha nak ciah kya hleih Boipha ya kä kya pha Koyin ah a kya yah ge ung Khanpughi ah mong lam gui thähla m’thei m’thang tu khai ah a kot a mi peit ah kya ci. Taigü Boi ah a kya lo kon ah a ming thang ciah Khanpughi ah a mong bi nak ung a k’sho bi ciah kya ci. A cun yah ung a ni cu a kya ah a ming thang ciah Khanpuhgi ah ming thähla ci gui ung tumat ah kya lo ci. A ni no apyein cu Khanpuhgi ah mong lam thähla m’theim’thang ci cu k’bup m’ghuih ci. Cuntupang ah phih a cun ah m’theim’thang gui a cang ah läk ne hmat ci gui cu k’kha phak ci gui ah kya ci” ci ne pyein ciah kya ci.
A ni ah bi loh nak gui a k’däih ung Boiphaya gui no ngami ah a mi hto k’shäm gui ah ta phih a mi mät no a mi mät a k’ni ah a mi pyantham vai hlü ci cu a ni no hnguh ciah kya ci. Christu kum 1643 ung thähla m’thei m’thang nak ung ka no ng’pät ne Congregation of Jesu and Mary ci ah ng’htoi cu m’düih ciah kya ci. A ni ah a po gui ah kya ciah Boiphaya ah kya lo tu k’hai gui m’htoi gui ne Taigü khaw ung om ciah Boiphaya gui pyangtham gui khai ah a mät ah ghinlu gänap ciah kya ci. Bä ciah John Eudes cu Boi Yesu ah ghui m’lung lah Nu Maria ah ghui m’lung cu a kya ah u pa ne um m’nai ciah kya ci. Christu kum 1670 ung a ni no m’shukchuk vai ah khin ciah Boi Yesu ah ghui m’lung ci ah m’ming awn ca uk tumat guk ciah kya ci.
A cun ah ca uk ung Missa gänap nak lah parik myeita gui om ciah kya ci. Kho kum k’phli sho lo hleih a ni no a khang nak a gah cu Boi Yesu ah ghui m’lung no Bä caih Magaret Mary Alacoque a m’dang nak awn ng’düng ciah kya ci. A ni cu Christu kum 1680 ung shih hleih Christu kum 1952 ung ung Bä ciah k’chang tumat ah kya lo ci. A ni ah a ming thang pi ciah a k’chü m’kha cu “ Missa gänap nak ah bäkhäk nak bi yah ung hlü ci cu mong k’thum om ci. A k’htük pi k’bäih ah ng’pyantham vai, a k’hngih nak ung a k’ni ah bi vai lah a k’thum nak ung Khanpughi am shümhmat nak ba vai ci ne pyein ci.”
