Nu Maria Khanmopi ah a mi khai püi nak ah poi
Nu Maria cu kho m’dek ah khan ah a om nak a ni ah a k’hngu pi ah k’hngüp ung Khanmopi ah a kyä lah a müim’cha a mi kaipüi cu mi mi no mi yum ciah kya ci. A cun cu cang ciah kya ci. Christu kum1950 ung a ghaleigoi nak Papa Shangpughang Pius no cang ci cu yum nak lam ah kya khai (Munificentissimus Deus) ci ah ca gu ne a m’dang ah kya ci. Nu Maria cu Ephet Mânggo ung a hngu pi ah om ghüt ci. Boi Yesu ah hluläk k’chang gui no cu Nu Maria cu a k’cang ah shi ci ci la hip düt ci ci cu a ng’khai ah kä m’dang ci gui ah kya ci.
Cung phih Nu Maria ah kyä cu kä dídam ein ne Khanmopi ah gok ci ci cu cang ciah mong ah kya ci. Nu Maria a kyä lah a müi m’cha mah ah khanmo pi ah a gok hnging cu a ni cu Khanpughi ah a Nu ah a kya nak lah a ni ah kyä cu htitheing ciah a kya ah phäh ah kya ci. Nu Maria Khanmopi ah a kai nak ah yum nak cu yumtu ng’bum ung om ciah yumtu k’chang gui a van no yum ne a mi k’bäi cu Thûm lah k’ceng’shä gui ah guk nak ung hnguh ah kya ci.
Nu Maria cu maapi a htük pi Khanpughi ah mong lam thähla ci gui am lam m’shüm ciah Nu ah kya ci. A ni cu Khanpughi ah ng’shä Khanhtapup no a pyein cu ng’ngai ciah kya ci. A ni ah yum nak awn a täng ah a pai Elizabeth a gunghtot vai ah hteit ne a kya cu a ni ah htahtana bi a bi ah m’lung nga m’dang pe ciah kya ci. Khanpughi ah ng’shä Khanhtapup Gabriel no Boi Yesu cu nak khai ci ne m’thein hleih Khanpughi ah k’pyhon nak ah Mission cu a cun ung ka no leng lo ciah kya ci. Canan Mânggo ung let that poi a mi bi nak ung capyit tui hmai lo hleih ng’chu ng’la goi k’chang gui ah maa ah ng’aa ng’ca nak kä om ein vai a hta Boi Yesu am a gunghtot tu vai ah a pyein cu hlü ciah k’chang gui a gunhtot tu hlü cu ng’dang ciah kya ci. Pentecost poi hngüp hlülak k’chang gui awn a täng ah om tu ne, Muh Khanpughi a k’äih tu cu ngami ah Khanpughi ah mong lam bi loh nak ung tumtu ng’bum awn ät ne kya vai ah a pyantham ah kya hleih Khanpughi ah a hngu läk ne bi bi ci gui am lam k’ni a m’shüm tu gui ah ng’dang ci. Nu Maria ah yum nak, Khanpughi ah k’chü a ng’ngaih lah Khanpghi ah ng’yak hlü ah hlo ah bi a bi gui cu Christian k’chang gui a van, a k’tung pi ah Khanpughi ah bi bi ci gui ah phäh ah k’lam k’shüm ah kya ci. A cun ah kya hleih Boi Yesu ah Salvation ci ah k’pyhin nak ah mission ung Nu Maria cu a päng ah chüt hleih ng’hton ne bi tu ciah kya ci.
