Ng’Chú ng’là goi ng’táinák-ah màwng.

 Jesu nawh a piéin vai piéin nehtah Galilee khàw nawng ghütneh Judea khaw-’còi, Jordan lòng, vang ga lam-ah hteit ci.   K’Chàng gùi a k’dá nawh ng’búi neh läk u hleih a cun zah-ah m’gü m’gái bà gùi ci.  Pharisee gùi cuh, ak’chü ’koih vai u neh Báwi-ah lo neh “kat tumat kù-ah phäh-ah, k’chàng nawh a’chú nawng bà hnging khai ang?” ci neh ng’si u chü-tah Jesu nawh “A k’htük-ah tüi piàng ci nawh k’pámí lah k’hngumí k’hngih bäng k’hläm a tüi-ah màwng lah,  A cun-ah kia hleih k’pámí  nawh anu pá  nawng  ghütneh a’chú-ah ng’dàwn hleih cun goi cuh, hla-ät käü-ät-ah kia lo khai goi, ci-ah, m’cäinák ung om ci cuh kä nami ng’za tu man ci-ang?  Cun-ah kia hleih chú-ng’là goi cuh, k’hngih-ah kä kia neh tumat bäng-ah kia ci. Khãnpùghí nawh a m’chúm a m’dòn gùi cuh, k’chàng nawh kä m’cha m’tái eìn hlä” ci neh piéin ci. “Cun-ah a kia-ung Moses nawh a i-ah kia hleih m’cha nák-ah cã peneh ng’tái vai-ah a pian ang?” ci neh ng’si u hleih Ani nawh nangmi-ah m’lùng líng gái hleih k’chú-awn ng’tái hnging-ah Moses nawh piàng ci. A k’htük-ah cun-ah kä kia ci. Nangmí-àm, ka piéin cuh, kat düit-ah kä piéin-èin ah, a k’chú nawng neh a hei k’chú nák tu bà ci cuh, plet ci. Ami nawng-ah k’chú, la tu bà ci cun phih, ami chú katnák ci-ah kia ci” ci neh piéin ci. A-hlu-läk gùi nawh phih, cun aih-ah k’chu cèi mah kä ni ung k’chàng cuh kä chucèi-mah líng-ung ni tu bà phia vè,” ci ci gùi. Jesu nawh “Avan düit nawh sin-ah k’chü, gah hnging khai-ah kä kia ci. A péit bäng nawh vah gah hnging ci. A i-ah kia hleih ci ung a nú-ah poi ’kiong mät-ah a cun-ah kia ci, om ci. k’Chàng nawh a ng’zü hlak phih om ci. Khãnmòpí ghin khaw-a phäh-ah a mät nawh a mät m’cäi neh a ng’zü-ah kia ci phih om ci. Gah  hnging ci nawh gah hlä,” ci neh piéin ci.