NI CA CHRISTIAN THUM M’SHAH
Shing m’kang müi m’cu cuh Boi yeisu cuh k’phyon ca boi-ah yum tu k’chang päng-ah phäh yei tu vai kia ci. Shing m’kang müi m’cu nak-awn bä neh thuuk ca Boi Christu m’hngi nak-ung ghün om nak tu a k’cum-ah m’dang hnging cuh ng’tai nak-ah kia ci.
Cunte yumtu k’chang ak’da noh ghün phyon nak-ah kia ca m’shing m’kang müi m’cuh nak gui ami nong nak gui can phih thüi vai-ah hnguh-ah kia ci. I kia hleih cun gui akia lo ci-ung ak’htük pi Charistian gui-ah bi loh man thum gui m’thong hlü ca k’chang gui-ah ng’peng ca m’thei m’thang nak gui, caa tün neh ami nak bi vü gui-awn hngei tu hgna hleih bi hlü ca k’chang m’sha-ah ng’peng ca m’thei m’thang nak gui-ah phäh shing m’kang müi bi loh nak cuh ng’yih lo ca kia ci.
“Kä om-ah tah kä hmat ka pi ci” ci-ah hlo-ah Christan ng’pai gui noh shing m’kang müi tawk nak (apa ahta tawk nak) gui cuh kä mi hnat hlu-ah akho lä düit ci neh pyein ci gui. Nak k’phyon ca Boi-ah ghün lu ana thawn nak peit cuh van noh m’nai neh shüm ba vai phäh api k’chu ka ning hmat tu hlak gu hlü ci.
Apa ahta tawk nak-awn sing k’thum Khanpughü tumat-ah kong ät nak cun phih m’dang nak-ah kia ci.
AD 144 kum-ung Antioch Mango-ung om ca (St.Ignatius) noh kho m’dek k’chang van hngün-ung Christian gui ng’khai hleih ami ng’dang tu hnga vai phäh-ah apa atha tawk nak cuh tün neh pyang lo ci. Kurusu cuh Charistian gui-ah ng’nän k’tung, Christan gui-ah phyon nak-ah ahtük pi Christian gui noh ni ca yum tu ng’bum ami kia nak gui cuh m’dang nak-ah bi man ci gui.
Apa ahta tawk nak cuh
- Christian-ah m’hmat nak
- Christian gui-ah ng’nän nak
- K’phyon ca Boi-ah müi k’tung
- Sing k’thum Khanpughü m’dang nak
- Boi-awn ät neh shing m’kang k’koh nak m’dang nak
- Boi-awn shih ät neh Boi-awn ät neh ghün lo ba vai m’dang nak
- Boi-awn shing m’kang k’koh nak cuh m’dang nak
- Shing m’kang k’tung-ung kat nak-awn sih neh Boi-ah ghün lo ba nak-ung ng’dawn tu ca tumtu k’chang-ah kia-ah mong m’dang nak gui kia ci.
M’ca-ung tawk neh apa ni ci-ah m’cu cuh
Pa khanpughü noh mikmi gui m’vut khui-ung ka noh a pyang gui ca kia hleih ani m’hngi neh m’tam vai lah ani noh atün pyan phung cuh m’hngi ca akia-ah mong cuh shüm nak ba vai.
Ng’kyang-ung ahta ni tawk neh m’cu cuh
Pa Khanpughü noh ng’mü van tün pyang neh k’chang cun phih hlü nak kä nak kä om-ein khai-ah atüi pyan te, kat nak-ung gok hleih phih ahta am’sih vai chüt hleih ana m’hngi gui-ah mong shüm nak ba vai.
K’hleing vang vei tawk nehHti theing ca Muh ci neh m’cu cuh
Phyon nak mi gah ca mikmi gui cuh mät noh mät m’theing vai-ah kä mi ng’näh ci. Acun-ah hlo-ah hti theing ca khanpughü-awn ät tu vai cun phih kä mi chin ci. Cunte Hti Theing ca muh khanpughü-ah gung htut nak-awn Khanpughü-ah hta gui-ah mi kia lo tu ci. Cun gui-awn hta Boi mät-awn atän-ah Khapughü-am pa ci neh mi chü tu vai äi nak mi gah tu ci.
A k’hngu pi-ah shing k’thum khanpughü tumat-ah ng’ming-awn ahlü ahngäi cuh kei-ung kia hlä ci neh mi chüm ca kia ci.
Guk ci. Damian Dal
