Bä ciah Euplus ah ghänlu a mong

Bä ciah Euplus cu AD 304 ung cang lam ah phäh ah a hngun pe ciah bä caih k’chang tumat ah kya ci. A cun yah ung Roma Shangpughang mâng ci gui cu Christian k’chang gui a mi kalu nak gui yah ah kya ci. Kho k’hngüp ät ung Nandaw a k’pung, lam k’khan ah k’chang tumat m’o ne a m’lä m’khang cu Sicily mânggo ung om ciah Catania ghunkhaw mang yung kä dímkyäp ein khai ah ci ciah kya ci. A cun ah k’chang cu Euplus ah kya ci. A ni no a pyein cu “ kei cu Christian tumat ah kya ci. Kei cu Christian tumat ka kya ciah kya hleih ka shih vai ah ka m’lung linag ci ci ne ng’lä m’khang ciah kya ci. A cun ah kya hleih ghunkho mang no a k’chang gui am chü hlak gui ne a ni cu Nantuin ah a khapüi hlak gui ah kya ci. 

A ni ng’shi k’ca khai ah ghunkhaw ng’vai ah maa ah gok yah ung a ni cu ng’thu k’ni tumat k’kot ciah kya ci. A ng’shi ah mong cu

          “Shin cu nang ah ca uk ma?

           “ Kei ah kutu ng om ci nang a ng’vai no na hnguh ci.”

           “ Nang am shin ah mong gui a u no ang a ni m’thei tu?”

           “ Khangpughi ah hta, kei mi ah Boi Yesu Christu ung ka no shin cu ka ng’thei tu ah kya ci”

Ghunkho ng’vai no a ni cu thong khui k’kyong ah k’cha k’thum khei chum ne ta a ng’shi k’ca ba vai ah a maa ah chü ba hlak gui ci.

           “Nang ung kei no kä na sham ein vai ka pyein ah ca uk tuhgüt om ci ma?”

           “Om ci” ci ne pyein hleih,

           “a hoi ang” ci ne ng’shi ba hleih

           “ A k’kyong ah” ci ne m’shang ba ci.

          “ Na sham ba yah a kya ung shin ung m’dang lo ci hleih Euplus no a m’lung yon ne shing ung ci ne pyein ci. Roma Ghunkho Mang cu a kya ah m’lung k’she k’tat ne Roma Nat am  gänap nak a bi vai ah a yum ah chüt hleih  a ni a mi kalu tuk tha vai ah a k’chang gui am pyein ci. Roma Ghunkho Mang no Euplus am a yum nak a nong vai ah ni lo püi k’chit ne a lu k’ke m’chün pit ne a mi ngon ah kya ci.