Bä caih Clares ah ghünlu a mòng
Poor Clares Mamah ng’htoi m’düih ghüt ciah Bä caih Clares cu Christu kum 1193 ung Asisi Mânggo ah hlüngtai ciah k’kyawng khui ung ka no ng’tüi ciah kya ci. A khokum ghalei k’ko ung Bä ciah Francis ah kyünhloi yah a mong m’thei m’cäi cu a kya ah yum tun gak tu ne Potiuncula Mânggo ung a mät no a mät Boi Yesu am gänap khai ah düm hta ah hteit ciah kya ci. A ni ah ni ciah hluihlak gui lah ng’shäi ciah a lu cu m’chünpit ne a ci kon ah Francis no hlui kyan tumat pe ne Bastia ung om ciah Benedine Mamah ng’htoi ung a om tu hlak ah kya ci. A ni ah ng’kho k’chang gui no im ah a lo ba vai ah chü lo ba u hleih Clares cu phaya sin ven ne Boi Yesu ah kon ah ka cei a hei a u phih kä om ci ci ne pyein ci.
A ni cu a hei k’hngumi hta gui awn a täng ah Mamah ng’htoi tumat cu m’düi ciah kya ci. Poor Clares ci ne a ng’ming thang ciah hleih k’chang gui no a mi hmat ah ngami ah duyai nak lah m’teng ciah ng’yu nak ba ah läk lam cu lä ne om ci gui ah kya ci. Ngami gui cu khodok kä ng’leh ein ne hteit ghüi ne a hngüp täi kyünhloi ne u ne a u awn phih kä ng’hta ko ci gui. Christu kum 1228 ung a k’ko nak Papa Shangpughang Gregory no Bä ciah Clares am m’hteng ciah ng’phep guih ne du nak ah läl lam ka no a pyhong khai ah ci hleih Clares no a pyein cu “kei cu kei ah kap nak gui ung ka no ka pyhon vai ah hlü ci. Boi Yesu ah hnguh ka läk nak ung ka no ka pyhon vai kä hlü ci ci ne m’shang tu ba ci. A cun ah kya hleih a u no phih a mi mät ah shäko ah khoh tang cu a mi lak vai ah kä pyein hnging ciah kya ci.
Christu kum 1224 ung a k’hngih nak Frederick ah gak’kap no Asisi Mânggo m’dî khai ah lo ci gui. Clares no bä ciah Sacramentu k’kot ne ngami gui hnguh gui khai ah hteit ci. A ten hta ah a kya ah cäicat ne kyühkyok nak vai tumat no gak’kap gui cu a pha gui ah kya ci. A cun ah kya hleih ngami gui cu Mânggo a í ah kä ci hnging u ne ng’hlat ne dong ba ci gui ah kya ci. Christu kum 1253 ung a hngun kä pit pha hta yah ung Bä ciah Clares cu “Kei na na tüipyan ah phäh ah nang Boi ung kongkyi om hlä” ci ne pyein ghüt ciah kya ci.
