Bä ciah Laurence ah Ghünlu a mòng
Dudong ci gui ghung m’htei gui ciah bä caih Laurence cu Roma Mânggo ung Deacon tumat ah kya ci. A ni cu yumtu ng’bum ah khohtang lah a mi gänap gui ghun m’htei khai ah tarvon a mi peit ah kya ci. Christu kum 157 ung Papa Shangpughang a k’hngih nak Sixtus lah Bä caih Callixtus ah m’dek kaa m’cümhngün ung Deacon k’phlii cang lam ah phäh ah a mi hngun a mi peit kon ah a ni no a ghui bät yoi ba ne a cun ah a yoih ba ah ngui gui a van cu dudong k’chang gui am pe gui ciah kya ci. A ni ah ng’khai lang ciah m’lung cu ng’yak lo tu u ne Romah yumtu ng’bum ah ngui gui cu eikaret Mang am hteit ne a peit vai ah a mi pyein ah kya ci. Laurence cu kho k’hngüp k’thum sho lo hleih yumtu ng’bum ah gung htot nak gah ci gui ah dudong k’chang gui awn a täng ah lo ba ci gui.
A ni no ngami gui Eikaret Mang ah khah püi gui ne Shingui cu yumtu ng’bum ah khohtang gui ah kya ci ci ne pyein hleih Eikaret Mang no Laurence a kya ah m’lung k’she na ne a kya ah kalu na ne ta ngon khai ah a mm’lung phukpit ciah kya ci. A ni no Laurence ah hluihlak gui hluh pe ne mei k’eh k’cang ah meih a mi ng’shaih nak ah m’shi khan ah taih ne a mi ng’shaih vai ah pein hleih a phan ah k’chang gui no a cun ah a mi ci ah kya ci. A k’sho mei k’cang ah khan na om ne ta Larence cu eikaret Mang lam ah ng’hlat lo ne gaih püi ne shin lam hngin lo püi ci. Vang lam ah m’hlat ba ci ne pyein ci. A ni kä shih pha ung Roma Mânggo a k’ni lam ah a ng’thonghlah lo vai ah k’taigü ghüt ciah kya ci. A kya ah kyomtang ciah Pacilica Phaya kyawng nu tumat cu Bä ciah Laurence a mi ghon nak ah kuu ung Emperor Constantine no a coh ah kya ci.
