Bä ciah Victricius ah ghünlu a mòng
Christian yumtu ng’bum ung a k’tük lam ngoiä shümlä nak vai mong gui ung Roma gak’kap tumat Christian ah kya lo ci ci ne a mi m’dang cu ni hlieh kä hnguh man ah kya ci. Bä ciah Mateu no a guk ah ng’thu k’ni ung shing m’kang k’tung ah k’kaa ah ka no ga k’kap k’pyhaa khong mang ci tumat no a yum nak a m’dang ah mong cu a mi guk ah kya ci. “ Shin cu Khanpughi ah hta a k’cang ah kya ci ci ne Mateu 27: 54 ung om ciah kya ci. A cun ah pyein ciah k’chang cu Boi Yesu ah hluläk k’chang ah kya lo hnging ci ci ne pyein ne gah ciah kya ci. Victricius cu AD 5 yah ung Christian tumat ah kya lo ciah Roma ga k’kap tumat ah kya ci. Boi Yesu ah m’thei m’cä nak ung ng’tuk ah vai cu kä yum ciah kya hleih a ni ah Boi ah k’chü ng’ngai ne a m’dang vai ah sityei pya a mi bi yah ung a ni ah shäm kho ah hlenget gui m’dek khan ah k’chak hleih a ni cu gak’kap dong ah kya ci ci ne pha u ne ta muiton awn a kya ah m’ghuih ne a mi kalu nak ah kya ci.
A cun ah m’ghuih ne a mi kalu nak kon ah a ni ah k’poih ba ciah ghünlu ung hteit hton ghüi ne Khanpughi ah mong lam gui thähla m’thei m’thang ciah kya ci. A k’hngu ah Rouen ung Taigü Mang tumat ah kya lo ci. A cun ah piggo hta cu k’chang gui ni hleih kä om ne hteit hton ci gui phih kä daa tu ciah kya ci. Pyinhtit hliip lam ung Christian yumtu ng’bum tuhgüt a ng’düih hnging cu Bä ciah Victricius ah ghnun m’thei nak ah phäh ah kya ci. Dîmkyäp nak lam bi ciah k’chang tumat ci ne a ng’ming thang ciah kya hleih England kho ah om ciah Christian gui cu ….. ung a mi ng’ngaih kä ng’hmat cu a mi ng’ngaih a ng’hmat ba vai ah phäh ah a ni cu chüthäm ne a mi ng’lak ung a mi ng’shä hlak ah kya ci.
