Bä ciah Ignatius ah ghünlu a mòng
Jesuits ng’htoi m’düih ciah Bä ciah Ignatius cu Christu kum Spain ghunkhaw Loyola Mânggo ung ng’tüi ciah kya ci. A ghun ah ghün nak vai ah ga k’kap tumat ah kyat bi bi hlü te ciah a ni cu Christu kum 1521 ung Panplona Mânggo ung k’bui k’cum ne a mi kya yah ah kya hleih a myok kyisan no a kho ung kap hlei a kho nget ciah kya ci. A cun yah ung a ni cu a kho kum 30 be püi ciah kya ci. A gai lo ba kon ah ng’yum m’hngi nak gui a mi guk nak ah ca uk shang gui ne kya hleih a cun awn a m’lung ka üp ciah kya hleih Boi Yesu ah mong lam lah Bä ciah k’chang gui ah mong lam guk nak ah ca uk a mi peit ah kya ci. A cu ah ca uk gui a mi peit nak cu ngami ah ni lam gui a mi m’dang vai hlü ah ng’ngai lo ne ngami gui cu kei awn täng ciah kyähla om ci gui ngami ah ci hnging gui kei no a I ah kya hleih kä ci hnging ang ci ne m’läng m’khang ciah kya ci.
A cun ung ka no leng ne Boi Yesu Christu ah ga k’kap tumat ah a kya lo vai ah a m’lung phukpit ne Manresa Mânggo ung om ciah Yahteih ng’htoi ung lut tu ciah kya ci. A ni ah ng’mü m’cha lam ah buiawt gui cu a ming thang ciah ng’mü m’cha lam ah läklam kyan ung a guk ah kya ci. A cun ah ca uk cu a ghaleiät nak Papa Shangpughang Pius no ng,mü m’cha k’pyhon nak lam ah a hteh nak ung ghung m’htei khai ah ng’kyüm be tu pi ne ng’büh ng’mang tu pi ciah upatei kyan ci ne van no a hmat vai ah a pyein ah kya ci. Jerusalem lah Roma ah Phaya teng khai ah a hteih kon ah a ni cu Taigü Boi ah ghinlu lam a htei nak ung hlü khai gui ah hnguh hmat nak gui ng’thei ng’thang khai ah Paris Mânggo ah htei ciah kya ci. A cun ung ka no yum nak lam ah ng’htoi pyam ciah kya ci.
A cun ah ng’htoi cu Christu kum 1540 ung Society of Jesus ci ne Papa Shangpughang a k’hngih nak no cang khai ah a m’düih ah kya ci. Ngami ah ng’tuk nak vai ah a mi m’läng khang ah k’chü cu “Khanpughi ah k’taimah nak a ming a thang lo pi hti vai ciah kya ci. Ngami ah ng’mü m’cha lam lah pin nya lam a ng’htoi lah ngami ah ga k’kap vai hlü ah läk lam gui a phäh ah Jesuits gui cu Kho m’dek pum ung hteit hton ne Khanpughi ah mong lam Thähla m’thei m’thang nak ung a k’thapyhat ah bi ci gui ah kya ci. Bä ciah Ignatius cu k’poih ba ciah a ni ah ghinlu cu Romah Mânggo ung om ne ta a cun ung St. Philip Neri awn ng’teih püi ah kya lo ci goi ah kya ci. A ni cu Christu kum 1556 ung shih ciah kya ci.
