NU PA GUI-AH POI K’HNGüP
Kho aa neh m’yuk ca July k’cha-ung Catholic yumtu ng’bum noh ni tu hnga ca poi tumat cuh kum täi hleih bi ci. Cun cuh Nu Pa gui-ah poi-ah kia ci. July k’cha a (26) k’hngüp cuh m’va kho pum-ung om ca Catholic yumtu ng’bum gui noh St.Jochim lah Anna m’tam nak-ah nu pa gui-ah poi hngüp ci neh khän neh bi ci. Cun cuh m’va kho pum-ah thum-awn phih ng’awi ci. M’va kho k’chang gui-ung nu pa, saya gui lah ghü ng’vai lo ci gui cuh m’hngi yei nak-awn m’htei m’hta cuh ni ca m’lung hnga-ah kia ci. Cun-ah m’lung-awn nu pa gui-ah poi hngüp cuh üp htak hleih a kum täi bi loh-ah mong cuh hmat hnging kia ci.
Kho m’dek pum a ng’ming thang hleih ca guk ca caguk k’chang Mating noh “ Na nu lah pa ani ghün yah-ung ani pyein na ng’naih vai, ani shih-ei kon-ah viik neh kí na m’la vai ” ci neh pyein ci. Cun cuh a kia ni ca k’chü m’kha-ah kia ci.K’hmo yah neh hnguh hmat nak gui a kyen yah-ung na pa-ah ni bä nak gui kä hmat neh beit kä ng’yak nak gui aom-ung phih nu pa gui ami ghün yah-ung a k’ni täng-ah ng’hlat ba neh om ih ba vai. Nu pa kä om ba kon-ah nei kat nak gui shüm ba neh ng’yu ba ta. Mät mät nu pa kia lo tu kon-ah mät-ah nu pa noh mät I hlo cha a na m’htei cuh hmat lo tu hta gui kia ci. A m’sah hta k’hmo gui noh ami nu pa gui ami m’lung m’thüi gui neh hteh ta ci gui phih om ci. Nu pa gui noh ami hta gui-ung kah ami ng’yah hlü cuh ngui, ghui khoh tang-ah kä kia ci. Nga mi-ah ng’yak hlü cuh m’hngi yei nak lah hmat peit nak thei gui-ah kia ci. Kho m’dek k’khan-ah nu pa gui-ah kut cuh lak ci-ah kut-ah kä kia neh pik ci-ah kut-ah kia ci. Ng’thu k’theing-ung “Na nu pa cuh na m’lung k’tha avan-awn na üm tha vai.Ning hta nak ca na nu-ah yai ca nak gui phih kä na k’hmih vai. Nang ka vai-ah nganai-ah ani bi loh gui cuh I hlo k’cha na thung ba hnging khai-ang?. Pa-ah k’chü ng’ngaih-ah hlo-ah nu-ah k’chü phih kä k’hleh vai.Cun-ah m’cäi nak gui cuh na lu k’kye-ung kyom htang ca lu pong, na k’hngü-ung na äh-ah awi hta-ah kia khai” ci-ah om ci.
M’va gui-ah thum-ung nu pa cuh Khanpughü, Saya, Boi gui-awn m’täng ci gui kia ci. Tayuk pa khui gui noh hnguh ge-ah Khanpughü ci neh pyein ci gui. Na nu apa na üm tha gui ci cuh k’chü k’khaän-ah kia ci. Cun-ah k’chü khän cuh “Nang cuh kho m’dek k’khan-ah khoh cham mah neh ghü neh na ghüng khai.”ci-ah kia ci. Nu ghü pa ng’vai üm tha ci cuh a ngoi-ah phih kä du khaih khai. Khoh cham-awn kä ng’büh-ung phih m’lung yei nak-awn ng’büh khai. Nang-ah k’khan-ah na nu pa-ah ni bä nak na hmat hlü-ung mü-ah k’khanmopi-ah ka ai hli gui dan neh k’chei shüm mä.
Guk ci Hla Aung (KT)
