Bä ciah Macrina ah ghünlu a mong
Bä ciah Macrina cu AD 4 yah ung ng’tüi ciah kya ci. A khokum ghaleigoi (12) be lo hleih a nu lah a pa no a k’hmo k’chang k’pami hta tumat awn a ni letthat hlak ah kya ci. A ni letthat vai ah khawn k’hngüp kä gok lo pha hleih a cun ah k’pami hta cu a ten hta ah shih ciah kya ci. A cei shi lo hleih Mscrina cu a mät no a mät hmei nu ci ne m’läng m’khang ne a u no kä yum m’hngi ein tu ba vai ah om ciah kya ci. Hmei nu ah kya ciah a ni cu khotang a daa awn yeikyai ne om ah ghünlu a ta ng’shung hngei ne htitheing ciah ghünlu awn om khai ah pyein ne a nu k’däk hnging ciah kya ci. A nu a shih kon ah Macrina cu a mi k’kyawng khui ah shämko khoh tang gui ah ng’vong k’cham gui a van cu Mammah kyawng ah ng’lat khai ah a pyan ah kya ci.
A ni ah a be Gregory cu AD 379 ung a im ah lo ba yah ung Macrina cu goi ne ih nak ung om hleih hnguh ciah kya ci. Ngani a ni ng’nu ng’be cu shih nak lah ghün om nak ah mong gui cu pyein ne a thuuk ah ng’hta ng’ko ci goi ah kya ci. Macrina cu ng’mü m’cha lam ung a k’thuuk ah hnguh hmat ciah kya ne hnguh hmat k’chang a be hngo cäi cat khai ah pyein hning ciah kya ci. A ni ah pyein hlak gui cu k’chang hei gui ah ta phih hlüng tai tu ba hleih hmat ci ci cu ng’dang ciah kya ci. Gregory cu a pai hta ah k’taigü gui a m’cuu cu a k’cum ah ng’yak ciah kya ci.
“ A k’cum a ng’däih ah ghüng om ciah Khanpughi aw..kei cu ka nu ah poi k’kyawng ah ka ng’tüi lo yah ge ung tün ne nang Boi ah ka lo khai ah ka ng’tüi lo ciah kya ci. Htitheing ciah Pa Khanpughi aw, nang Pa ah k’coi ung dììmkyäp hleih ka lo hnging vai ah Nang Khanpughi ah na täk phan gui ah Khanhtapup gui yu k’tüi ei lo. Kei ah kyä nong ne nag Pa ah maa ah ka om tu vai na k’chü k’hnga to. Nang Pa ah maa ah kat nak kä om ein hleih gänap nak ah ka ng’mü m’cha na do ei tu pe ä”. ci ne k’taigü ciah kya ci.
Macrina cu Khanpughi a k’ni ah yumäp ciah k’kyawngkhui ah ghünlu ah a phùm’dang ciah k’chang tumat ah kya ci. A ni ah Nu Pa cun phih Bä ciah k’chang gui ah a mi kya ah hlo ah a ni ah a be gui ah kya ciah Gregory lah Peter Sebatea cun phih Bä ciah k’chang ah kya ci gui ah kya ci. Macrina a shih ah chüt hleih Gregory cu a pai awn a täng ah om ci goi ah kya ci.
