Papua New Guinea lah Solomon ghün kho ah bä ca k’chang a kya lo khai Peter To Rot a phäh ah poi bi ci gui

Papua New Guinea lah Solomon ghün kho ung om ca k’taigü mang gui noh bä ca k’chang a m’hlüm tai vai Peter To Rot ah poi bi ci gui ah kya ci. A cun a bä ca k’chang cuh lo khai ah October 19, 2025 ung Papa shangpughang Leo noh bä ca k’chang tumat a m’hlüm tai khai ah kya ci. Ani cuh Papua New Guinea ung maa pi bäih neh bä ca k’chang a kya lo khai.

A ni cuh Tamat Saya tumat a kya neh kum 1945 ung ami ngon a kya ci. Colony Japan gui noh Bawi ah among kä pyein vai ah ami pyein te ah kya ci. A pyein lo ung Thawng ung ami chum hti ah kya ci. A ni ah bä ca k’chang a a kya cuh a hei gui on kä täng ca kya ci. A ni cuh a cun a kho dung ung maa neh bä ca k’chang a kya lo khai. A ni cuh a kyawng khui m’htei neh ni ca k’chang tumat a kya ci. Bawi ah mong lam pyein nak ung phih a m’lung k’tha gui mah nak neh bi bi ca kya ci. A cun a bi hnging cuh a täng a bi bi ci gui ah Bawiphaya gui lah a täng a bi bi ci gui ah phäh a kya ci.

A nu lah a pa cuh maa neh yum tu k’chang ah kya lo ci gui ah kya ci. A pa cuh k’chang gui khong mang ca k’chang a kya ci. A pa noh yum tu hleih pigo k’chang gui phih yum tu ci gui ah kya ci. A pa ah a ng’ming cuh Angelo To Puia ah kya ci. Bawiphaya om nak vai, ca ng’thei nak vai a mi coh nak vai m’dek cuh pei ci ah kya ci. Papa shangpughang Leo a gha-lei-thum nak noh a tüih lo nak on Bawiphaya gui cuh 1882 ung gok lo ci gui ah kya ci.

Peter To Rot a mi m’hlüm tai nak ung Solomon mango cun phih a mi phyion nak kum 47 a be nak phih bi ci gui ah kya ci. A cun a ghün kho ung dimkyap neh ami om vai ah Missa gänap neh k’taigü ci gui.