Ng’thu K’theing Ci Cuh
(1) K’hmo k’chang gui phäh ghün om nak lam k’ni ami hmat vai.
(2) Ghü ng’vai lo ci gui ghün nak ang’pyi lo-ung ka vai lam k’ni ami hmat vai.
(3) Ami nong-ah k’chang gui noh hnguh hmat nak ami ng’thei tu vai.
(4) Ng’thei ng’tham hngu hmat lo ci-ah k’chang gui m’yo m’nem nak ami gah vai.
(5) Ng’büh ng’mang ca k’chang gui m’gein nak ami gah vai.
(6) Du dong pa ca k’chang gui m’hloi nak k’tha ami gah vai.
(7) M’lung k’kiong ng’ngah täh bäng da ca k’chang gui ami bi loh lo tu k’cang vai.
(8) Bi lo tu k’cang ca k’chang gui k’hnga k’phlang nak gui ami gah vai.
(9) K’tha kyen ci gui ami tha mah lo vai.
(10) Gai gong ca k’chang gui lam m’shüm nak ami gah vai.
(11) She kak ca k’chang gui m’cäi nak ami gah vai.
(12) M’lung m’yo m’nem ca k’chang gui m’tam khah nak ami gah vai.
(13) Vuuk kat nak hnguh ca k’chang gui dim kyäp nak ami gah vai.
(14) Thüi hlei bong bai ca k’chang gui ami m’lung a dim gei vai.
(15) Hma kat nak om ca k’chang gui phyon nak ami gah vai.
(16) Ng’ngaih ng’khak nak om ca k’chang gui m’lung-ah üp nak ami gah vai.
(17) Christan avan noh ghün om nak vai phäh lam m’shüm ca kia ci.
Kei cuh ka k’hmo yah ca kia hleih ka ghün om nak-ung ni bä hleih ka ghün om vai phäh lam k’ni hlü ci. Kho k’hngüp ät-ung ka ghü ng’vai lo khai kia neh dim kyäp hleih ka ghün nak ka phleh hnging vai hlü ci.
A k’hngät k’chnag van-ah tah ghoi tu ba kia hleih-ang k’chang gui noh i-ah a minah nhguh tu nak gui bui lo-ung phih hnguh hmat nak ng’thei ng’tham tu vai hlü ci. A k’hngät mät-ah k’ka tu ba kah yo nak hloi kia hleih m’yo m’nem nak cuh bi vai hlü ci. A k’hngät mät bä tu ba kia kung phih k’chnag hngei gui m’gein tu thei vai hlü ci.
A k’hngät m’oung thüi neh akia-ah-ung ng’thu theing cuh äp ba vai. M’lung-awn ng’ngah tüh nak gui cuh ng’dang khai bi vai phäh ng’th theing noh na k’hngün na m’tho neh ng’dang khai bi loh vai pong lo-ung phih ng’thu theing noh lam na m’shüm ci. A k’hngät kä m’shang tu ba kä ng’ngaih phung kia-ah-ung phih kä toi-ein ba vai ng’thu theing noh na m’cäi ba ci.
Bong bai yah-ung phih ” Kei-ah lo vä, kei noh nang mi-am k’tha gui ka ning pe gui khai ” ci-ah ng’thu cuh shüm ba neh k’tha lak ba vai. Mikmi katmah k’chang gui Khanpughü noh kä nong düt ci nei.Khanpughü noh kat nak nei kä yei nak .Kat mah k’chang gui yei nak ca mo. A caw kia hleih phion nak cuh Khanpughü nih na pyan pe gui püi ci. Ng’thu theing ak’cum-ah phat nak-awn yum nak cuh däm lo pi hti khai kia ci. Mikmi Christan k’chang gui phäh theing thap hlüng tai ca ghün nak vai lam m’shüm ca ca uk cu Khanpughü-ah ng’thu k’theing-ah kia ci.
Teih püi po k’chang gui-aw mät cuh i-ang ka kiak ci neh ng’ngaih tüh ba ne tah ng’thu theing mi phat ko. Ng’thung theing phat nak-awn mät-ah ghün om nak-ung k’tha la neh k’ni pi ghün om nak akia vai k’tha na neh mi pyang ko.
