Bä ciah Ephrim ah ghinlu a mòng
A htük pi k’bäih yumtu ng’bum ung tumk’khon nak ung ghuih ciah a ming thang ciah bä ciah Ephrem cu Christu kum 306 ung Syria khaw Nisibis Mânggo ung ng’tüi ciah kya ci. A khokum 18 ung m’shi nak Sacramentu khan tu hleih yumgong ah kya ciah a nu pa no a ni cu imu ng ka no a ni hlot ah kya ci. A cun ung ka no a ni cu Nisibis Taigü Mâng ah kya ciah bä ciah Jacob ah phan k’chàng tumat ah kya lo ne Christu kum 325 ung Nicaea ng’bum nak ung Taigü Mâng awn a täng ah ng’läk tu ciah kya ci. Christu kum 350 ung Nisibis cu Pasia ah kutung gók hleih Ephrem cu Edessa a pei ah om ciah k’chàng a ken hta a om nak ah m’htung ah hteit ne a mät no a mät phep guih ne kyünhlói k’taigü ne a ghinlu läk lám gui àwn a ni ah om ciah kya ci.
A ni ah dìmkyäp hta ciah ku ung ng’mü m’cha lam ah ca gui lah ng’thú k’ni gùi cu a dâ guk ciah kya ci. Cún tu páng ah phih a ni am Taigü Boi ah a kya tú vái ah Ordination a mi péit hlü cu dam ciah kya ci. A ni cu Edessa ung a shäng shäng m’thei m’thang ciah kya ne kä càng ci gui ah m’thei m’thàng gui ng’hngu ng’tuk püi ne Catholic yumtu ng’bum ah läklam vai ah m’thei m’thàng gui cu ghung m’htei ciah kya ci. Christu kum 373 ung Edessa ghun khaw ung ei ok vai kä om lo ba ne coi gha duyai nak om lo hleih duyai ci gui k’pyhon gui khai ah a mät no a mät gänap ciah kya ci. A cun ah duyai k’chàng gui a gunghtot nak ung a k’tha maih ne a om nak ah ku ung a hteh ba kon ah k’cha ät hta bäng va a hngun ghing ba ciah kya ci. A ni ah däm pi ciah a bi loh nak gui cu htitheing ciah Tamah ng’äi gui cu k’taigü nak ung a mi mang ah kya ci. A cun ah kya hleih htitheing ca Muh Khanpughi ah harp ci ne ngoiä hnguh shümlä vai gui ung a ng’ming thang ciah kya ci.
