16th June 2025 ( Daily Reflection)

 Nang mi am a k’cang a ka piéin cuh a k’sé, a k’sé awn kä thúng èin bà vä. A-u nawh boh, na k’pat ng’bèing a ning k’beh ung vãng täng, cun bà mä-ä.  Na k’htù ning lák pe-hlü ci àm, na zih-khán phih lák hlak-ä.  A u kù nawh boh, ning ’ka lû naneh m’khãn phia-ghà a ning m’hteh ung ani awn m’khãn phia-m’kù hteit tu-ä. Ning sàng ci àm, pé-ä. Ning pu lo ’ci àm phih, kä m’choh-èin-ä.

K’chang gui cuh a cik ci ci ba vai, a pyein nak ci pyein tu ba vai, na lak pe ci lak tu ba vai cuh k’chang gui avan no yum neh mi läk man ca kya ci. Moses noh a m’thei cäi nak ung phih mik ui ah phäh mik ui ciah vah m’thei man ca kya ci. Bawi Jesu noh lo neh a k’se cuh a k’ni on nami thung ba vai ci ci. Nang beng vah ami ning k’beh ung vang na cun ba vai ci ci. Mikmi k’chang gui kavai ah kä loi ciah m’theim’cäi a kya ci. Cung tu bang a phih, Bawi noh kä mi läk hnging vai kä na m’thei gui ciah kya ci. Bawi mät noh läk neh ana m’cäi gui ah kya ci. K’chang täng a teng ung, avan ngawng düt vai hlü ah kya ci te vah Khanpughi täng a teng ung ni bä nak be khai ah kya ci. A k’se cuh k’taigü nak on thung ba vai. A k’ni bi peit vai cuh Bawi Jesu ah m’thei m’cäi mi läk a kya ci.