Shuh-htum poi

Bawi Jesu ah a yaica nak gui cuh mi bi ba ki a kya ci. Passion Sunday ciah Bawi Jesu noh a i hlok a ana yei nak gui cuh mi hnguh tu neh mik mi phih Bawi Jesu ah yaica nak ung ät neh mi om tu khai a kya ci.

Maaneh a k’pung a ng’bum neh shuhtum ng’tei neh ng’bumim kyong a mi lut ba ci gui. A k’pung a khanpughi ah ng’thu k’ni ng’ngaih nak a om ngon a ng’äi neh hteit a kya ci. Cun a kya hleih Bawi Jesu ah yaica nak ät tu neh Bawi Jesu ah k’pyion nak ung mi ät tu khai a kya ci.

Christù Jerusalem-ah hteit ci.

A cun-a màwng a piéin kon-ah, hteit neh Jerusalem-ah a na gok mà ci. Htan-lun m’htung pèi, Bethphage lah Bethany pigò pèi-ah gok lo neh a k’chàng k’hngih tüi goi neh, A piéin cuh, “Nani mà-ah om ci-ah pigò-ah hteit nä. Nani gok-ung, a u nawh phih kä ng’cùmnák man-ah miè htá ng’pong hleih nani hnguh khai. Gui k’phiàn neh hlò lo nä. Tumat kù nawh, “A i-ah kia hleih nani k’phiàn ci-ang,” ci neh a ning ng’si goi ung ‘Báwi nawh ng’za hlü ci,’ nani ci vai,” ci ci. A tüih goi hteit nineh ngani-àm a piéin-a hlobä bä-ah, miè htá hnguh ci goi. 33 Gui ani k’phián zah-ung, miè mah nawh, “A i vai-ah nani k’phián-ang,” ci ci. Nganí nawh phih, “Báwi nawh ng’za hlü ci,” ci ci goi.

Jesu-ah hlò lo ni hleih cun-ah miè htá-ah k’páng ’khãn-ah ami mät-ah hlui-hlak, ’khuih u nehtah Jesu cuh, k’hmoh ci gùi. Báwi a hteh zah-ung, lam-ung ami hlui-hlak gùi phah ci gùi. Htanlun m’htung k’pèm, zu-kium vünák-ung, a k’chàng ng’bum avan nawh a k’bä bä gùi ami hnguh tu gùi man-ah phäh-ah, zèi-kiài m’lä m’khãng neh Khãnpùghí ami m’tam lo cuh, “Báwi-ah ng’ming awn lo ci-ah Sangpùghang cuh, bä ci néi. Khãnmòpí-ung dìm kiäp hlä. A k’hlüng pí k’bäih-ung bä hlä,” ci ci gùi.

K’Chàng gùi-ung-kah, pharisee a m’sah nawh, “Báwi-aw, na k’chàng gùi m’cäi gùi-ä,” ci neh Báwi-àm piéin u hleih Báwi nawh, “Nangmí-àm, ka piéin cuh, ngamí ami dìng-ung, lung gùi m’lã lo khai gùi,” ci neh m’sàng gùi ci.