Ngthukní ngthei on täng ciah kchò kkhúishui gui.
Kchò kkhúshui mtùmtäng gui cuh Proverbs,Wisdom,Ecclesiusticus lah Ecclesiustes gui on akdá pí ah täng ci.Kyànca ung va hngá ci läi cuh Kkhaanpùghí ung ngyung khenggeng neh mtumcoih béit mcäìnak gui ah kya ci.Ngthukthài(New Testament)ung phih Bói Jesu no Kkhúshi mtumtäng khenggeng neh mcäì ci ciah kyanca ung om ci.Kkhúishui mtùmtäng a mshah cuh pùmá gui ung kah lo ci.A vai hlü ah ”Gok ah hleishäm.
A shó on mkyih neh kikong a ei.Kä mkyei k’eì ah mkyeí poi kpäh(kä cung)pukpoi kkah. Ning mkhuì veng ning mkhuì veng ci netah a buh ton.Tui kikòng ah ng’äi”ci gui cuh pùmá gui ung kah lo ci.Cun ah pùmá ung ka no lo ciah kkhúishui mtùmtäng gui cuh a i ah ami pyéin te ah pùmá ung ka no lo ci ciah akní ah pyéin ba hnging ci kä om ci. A i ah kya hleih ci ung kchò gui ah pùmá kkhúishui ah amòng gui cuh u no kä gukthén hleih akní ah u no kä hmat ah kya ci. Ave Maria(Hail Mary)Na yèi tu vai Maria o,a nghtéi khmà ah na bä ci nei. Kkhaanpùghí mät ning om püi ci.Khngumi gui ung nang no akní pí na gah ci. Na Htá Jesu no phih akní pí gah tu ci.Kkhaanpùghí ah Nú htíthéing ciah Maria o katmah keimi gui ah phäh ah a tuhchü lah kami shih lo vai ung na nghuingpa tu pe gui ä.Amen.
7.A i tuilì ung a i ei a ngshōn.A i lung kpò ung a i mei am ló.Shin ah Kkhúishui läí cuh vì lah shangpùghang pùmá ung ka no lo ci.Vì no mvuì a shäm pyéin chütah shangpùghang no a mná ah htá ah pyéin chütah vì no a mshàng tu ba ah kchi ah kya ci.A i ah a kya ung phih kä kya hnging ciah ami mtùmtäng hlü ah a kya ung ami pyéin ah kya ci.
8.Akshìng shu neh akshah a laihU no i kä pyêin màn te pyéin vai om ci hlok ah amóng alam mdünmhloi neh a gah tang vai guih guih ah ngloh ngchan hlak gui neh ci am ami mtäng nak ah kya ci.9. A ui shih a ài kyuk.A i phih kä mòng nggäì neh ghìng tu düt ci am ami pyéin nak ah kya ci.A shih lo ung phih htüm mshümnak vai kä om hleih ui lah ài ah hlo düt ah shi neh maih tu düt khai am ami mtängnak ah kya ci.
10.A hlèi pyéin hleih a mē a pyéin.A mòng a lam kä täng ci kcop neh pyéin tu ci am ami mtùmtäng nak ah kya ci. Hleì ah mòng a pyéin yah ung hlèi pyéin tu vai.A mòng a lam phäh phäh pyéin vai ah béitnak ah kya ci.11.A kkhòi khai kpoh pe u chütah a yòng phēi a ghoh.Kä ngah-tüh ah mlùng kshé mit netah amät ka bä mdí tu khap ci am amj pyéinnak ah kya ci.A kkhòi khai kpoh pe u chütah a mät ung a ei kcēi vai ah a ei meh vai yòng phēi a ghoh vai hlok óng ah mlùng kshé ktàt neh gùgak ci am ami pyéinnak ah kya ci.
12.A phù mhlùng neh a gáng guk ci.A mät lam ah kä kya ciah hmat lo netah càng ei tu ba ci lam ah a kyihkyok vai düt ah kä om ciah a phù mtaih neh ana hluk mok vai a lí kkhìm düüt äp ci am ami pyéin hlü ah kya ci.13.A i ung kä chüt kshàmpài ung chüt.Shin ah. kkhúishui nak cuh phih pùmá tumat ung ka no lo ci te u no pùmá kä pyéin ba thei neh kchi nglung düt kpoih ba hleih ami kkhúishuinak ah kya ci.
14.A shó on mkyih neh kikòng a ei.Shin cuh a shó ang a shú ang ngshi tu gui ung u no kä hmat ba ciah kya ci.A gah hlü om chütah vang ah mkyihmkyok netah a kyih tu yah ung a ei mang péit ami kkhúishui nak ah kya ci.Kchò kkhúishui gui cuh htana,phäì nà,béit kä ngngaì ci gui ah aktoi ah chütgok khai béit mcäìnak lah ngshä ngbàng nak gui ung a kya ah a phù däm ciah kya ci.Tumat hti tumat hti ka vai ni lam kní a phäh phäh ah na mshüm gui ci.
