Daily Reflection – March k’cha a ghaleik’chüih (17) hngüp ng’yak ah ng’thu k’ni
******************************************************************************************************************************************************************************
Daniel 9: 4-10, Luka 6:36-38
A htük nak ah ng’yak nak ung Daniel no a mät ah kat nak lah a k’chang gui ah kat nak ngami gui ah Khanpughü ah m’thei m’cäi kä mi ng’ngai gui ah phäh ah Khanpughü am ng’yu ng’yon ba ne a ng’hui nak ba cu ng’yak ah kya ci. Daniel no Khanpughü ah ng’shung hngei nak cu hmat ne a mi kat nak gui ah phäh ah k’chü m’gein nak cu ng’shang ci. A ni ah ng’yak hlü cu didam ciah Jerusalem a k’ni ah pyantham ba vai lah Khanpughü ah k’chang gui Kho phung got täm nak ung ka no a mi ng’hlah ba vai ah k’taigü ciah kya ci. Khanpughü ah m’hngi nak cu a tung pi ah a pyein hlü ah kya ci.
Tuhngoi ng’yak nak ah ng’thu k’ni mi yak nak ung Boi Yesu no mi mi ah mi yum ah hlo ah mi ghinlu ung mi ghin hnging vai ah lam na m’shüm gui ci. Mi k’mi gui cu k’chang mi k’chü m’gein ci ang? k’chang gui ah kat nak mi k’pyon hnging ci ang? k’chang ah khan ah a k’ten ah a ni ah cun ah nei kya ci ci ne mi k’bün ci ang? k’chü m’gein nak ci cu mi k’mi na yei na m’hngi gui ci bäng k’chü m’gein vai ah kä kya ci. Mi k’mi gui kä na yei na ne na u ceng gui ci gui, m’lung nak khai ah na ci ci gui ah k’khan ah phih k’chü m’gein vai kya ci. K’chang a I ah boh hei kya nak ung mät gok lo ba khai ci cu mi hmat vai hlü ci. Tuhngoi ng’yak na ung “ na mi Pa Khanpughü no a ning m’gein gui ah hlo ah m’gein tu thei vä. Kat k’büm ne kä m’cha ng’lang ein vä. Cun ah na mi ci ung nang mi phih kä ni k’bün gui khai gui. K’chang kä m’dii ein vä, cun ah na mi ci ung nang mi phih kä ning m’di gui khai gui. M’gein thei vä, ning m’gein gui khai gui nei. Peta vä ning pe tub a gui khai gui nei” ci ne mi ng’yak ciah kya ci. Khanpughü no mi kat nak daa tu pang lang hlei phih na m’gein gui ne na k’phyon gui ciah kya ci. Mi k’mi gui phih tumat ah kat nak ah phäh ah tumat no a m’gein vai kya ci. K’chang ah kat nak m’gein cu mät ah m’mü m’cha a yei nak vai ah kya ci. K’chang am peitak ung mät no gah ba vai ah ng’ngai ne kä peitak ein ah a kya ung mät ah ng’khai ng’ lang ah phäh ah Boi no na pe ba khai ah kya ci.
Tughngoi ng’yak ah gui a van teng ah a kya ung mät no m’lung k’ni awn bi ah ni ci gui a phäh ah Khanpughü no kyeisu na k’be ba gui khai ci cu m’yak ciah kya ci. Mät ah kat nak ah phäh ah a k’ni ah ng’yu ng’yong ba ne Khanpughü ah hlü ciah k’thagui shan ba ung Boi ah k’chü m’gein na cu a k’cum ah om kheng geng ci ci cu na m’thei gui ciah kya ci.
