Bä ciah Pactrick ah ghinlu a mong
Ireland ghunkhaw ung Khanpughü ah bi bi ciah bä ciah Pactrick cu Christu kum 385 ung Britain maanggo ung ng’tüi ciah kya ci. A khokum ghalei k’chüih ung Ireland ung k’phan k’chang tumat ah a mi yoih ah kya ci. bung hngu khaw m’htung gui ah ng’ lak ah khaw kum k’chüh peng peng om ne yum nak lah htitheing nak ung a hngun ghüng om khai ah k’tha nak ciah kya ci. Phan k’chang ung ka no lot lo ne a ng’tüi nak ah htet ba ciah kya ci. A im ah a gok ba kä shop ha hleih Ireland pakkhui k’chang gui no Ireland ah hteit ba ne nga mi gui am Khanpughü ah mong lam a thei m’thang ba gui vai a mi pyein ah a ng’mang ung she ciah kya ci. Christu kum 431 ung Om ciah Yahteih kyawng ung Khanpughü lam hnguh hmat nak gui a mong ng’thei ng’thang ci ta Ireland khaw ah a mi tüih ba ah kya ci.
Ireland khaw ah gok ba ne a ngeng kum Papa Shangpughang Selestine ah kut ung Taigü Maang ah kya lo ciah kya ci. k’phan k’chang ah kya ne m’naa gui a mi m’htei nak ah k’phya ng’tang hliip lam ah maapi bäih ne Khanpughü ah mong lam thä hla ciah kya ci. A cun kon ah Ireland khaw pum ung yat ne khai hteit hton ne a ni ah yum nak ng’khan ne Khanpughü ah taimah nak gui awn yum hei k’chang gui ah m’ung nga ng’thonghlah hlak gui ciah kya ci. A cun ah a bi lo gui a ming yum yeik’chang gui ah taigü gui no ng’yak un ne ta a Taigü maang Pactrick cu ngon khai gui ah pong ci gui. Khaw k’hngüp ät ung k’htei awn shun khai gui ah pong u hleih a pei ah ngoh ciah ng’hle mong ci awn a ni ngoh nak ng’thong ni hleih a ni cu kä mi ngon hlot ah kya ci. Ng’hle mong ciah k’chang cu a mi ngon ah kya ci.
Bä ciah Patrick ah khaw kum thumkip peng peng a k’tha nak awn Ireland ghunkhaw ung om ciah ah k’chang gui a van Catholic yum tu k’chang gui ah kya lo ci gui. Kho m’htung tu mat ung ka no kho k’nghüp 40 kyünhloi k’taigü ne ngoi ah Ireland ung ka no bä ciah k’chang gui om lo k’khai ci ne m’dang nak cu hnguh ciah kya ci. A cun ah Bä caih k’chang gui no Patrick am nang cu bä caih k’chang gui a van ah ning pa ah kya ci ci ne a mi ng’äi cun phih m’dang nak ung hnguh ciah kya ci. Bä ciah Patrick cu AD 461, March k’cha 17 ung Ireland khaw ah shih ci.
