Daily Reflection – March k’cha a ghaleik’yhum (13) hngüp ng’yak ah ng’thu k’ni
******************************************************************************************************************************************************************************
Ester 14: 1,3-5,12-14 Mateu 7:7-12
Tuhngoi ng’yak ah ng’thu k’ni ung shangpinu Ester no Khanpughü ah gunghtot nak a m’lung nga k’be awn a shan cu mi hnguh ciah kya ci. A mät lah a mät ah pakk’khui k’chang gui cu shih nak hnguh lo k’khai gui ah gui ah kya hleih Khanpughü bäng no a cun cu gunghtot gui hnging khai kya ci cu hmat ciah kya ci. A cun ah kya hleih Shangpinu Ester cu Khanpughü ah ghung m’htei nak yum äp ne shang ciah kya ci. A ni ah a m’lung m’yom’nem ne a ng’hui nak Khanpughü no ng’yak ne Parsha ung om caih Judea pakk’khui k’chang gui a van cin ne maih yop khai ah ci hlü ciah Haman gui ah ghoigham ciah m’lung cu ng’päng khai ah bi pe ci ah kya ci.
Mi k’mi gui ah ghinlu ung phih Khanpughüm am lang ciah m’lung ng’ngaih awn hlü ciah k’tha gui gui cu mi shang ciah kya ci. A k’hmät hmät mi shan ah keisu kä mi gah ciah phih kya hnging ci. Kho m’dek khan ah diimkyäp nak a yat lo vai, mi pe ng’leng ah k’chang ngon sheh nak gui kä om ein vai, k’chang tumat lah tumat vang m’neng nak kä om ein vai ci ne phih a shäng shäng mi k’taigü ne mi shang ci. Mi mät ka vai bäng kä kya hleih mi nu pa, mi phäi na ng’kho k’chang, mi teihpüi ka gui vai phih mi shing ci. A cun gui shan nak ung shan ah hlo ah kä gah ah mi ngaih nak cun phih a daa om ciah kya ci. Cung phih bä caih Polu no a I ang a pyein ciah a kya ung Boi Yesu cu a hlang ah om ne mi k’mi no kä mi pha nak ung om ciah kä kya ci. Mi k’mi cu a ni ung mi ghin ah hlo ah Boi cun phih mi k’mi ah a kyawng ah om ciah kya ci ci nr pyein ci.
A hmät mi k’mi no mi buiawt gui ah yaica nak gui a I kya hleih a om ang ci ne mi ng’ngaihtüh chit yah ung mi k’mi no mi shüm ba vai cu, Khanpuhg no kä ni ci lah tüihlei nak ung ka hngo no kyom ne ni ci gui va na pyan pe gui ci ci cu mi hmat vai kya ci. A cun ah kya hleih mi ghinlu ung mi buiawt ah yaica nak gui, kä taga cia gui mi awt yah ung Khanpughü yumäp ne mi m’ung theing ne ng’shäi khai ah mi pyan vai hlü ci. Mi k’mi no kä mi ci hnging gui Khanpughü no bi hnging ci ci cu m’lung kyawng ah a cum ah mi hmat vai hlü ci. m’lung m’yo m’nem nak lah yum nak awn be hleih shan ung Khanpughü no kä na nong ci ah kya ci.
