Daily Reflection – March k’cha a ghaleiät (11) hngüp ng’yak ah ng’thu k’ni
*************************************************************************************************************************************************
Isaiah 55:10-11
Tuhngoi maapi bäih ne ng’ yak nak ung Khanpughü ah cäicat vai ah bi loh nak hnging lah Boi no I a pyein hlü ci ah chü m’kha cu mi ng’yak ciah kya ci. Khaw k’aa lah hluitak awn m’täng ne a pyein cu mi hnguh ciah kya ci. Khaw k’aa lah hluitak cu khaw m’dek ni nak khai ah pyangthang hnging ciah kya ci. Khaw m’dek a ni ung geitko gui a I phih ni ne a daa ah vuipai ne a ng’theih lo ah hlo ah Khanpughü ah ng’chü m’kha cun phih ghumaa om ciah kya hleih a cun awn k’chang gui ah m’lung nga ng’thong hlat hlak ne k’chang gui ah yum nak cun phih khäng htek hlak ciah kya ci. A cun ah kya hleih Khanpughü ah k’chü m’kha ng’thu k’ni cu yum ne hläk ah a kya ung, mi ghin lu ung khanpughü ah ng’thu k’ni gui mi shüm hmat ne mi hmat ah hlo ah a k’cang ah mi läk hnging vai ah tuh ngoi ng’thu k’ni no na m’thei m’cäi gui ciah kya ci.
Gospel Mateu 6: 7-15
Tuhngoi Boi Yesu no mi mi gui I hlok cha mi k’taigü thei vai ci cu na m’thei m’cäi gui ciah kya ci. Boi Yesu ah hlo ah mi mi gui no I hlok cha mi k’taigü tu thei vai ang? Mi mi gui Khanpughü ah m’lung awn na ng’phan hlak gui ci cu mi mi gui ah m’lung a k’ni ah lang ne a ng’chüih nak ah kya ci. M’lung kyong ah om ciah hlo ah m’gong awn phih pyein vai hlü ci. k’chü m’kha ni lo pihti khai ah a daa pyein ne k’taigü nak düt awn kä ng’päng ciah kya ci. Mi mi gui ah m’lung kyong ah om ci gui a van cu Khanpughü no hmat püi ciah kya ci. Taigü ci nak ci cu Khanpughü yum äp ne a ni ng’htang’ko püi ah kya ci lah mät ah ghinlu ung buiawt ah ni k’she a van m’lung m’yo nem nak awn Khanpughü am gänap ne mät no mät kä ng’yih ngthu ein ne a cang ah m’dang ah kya ci. A cun gui awn Khanpughü ah ghinkhaw cu mi mi gui ah k’kyawng ah, mi phe ng’leng gui ung däm lo pihti khai ah kya ci. Mi mi gui ah ghinlu ung Khanpughü no a I ang a bi hlak gui hlü? I ang a na na ng’yak gui hlü ci cu k’taigü ne Khanpughü awn ng’hta ngko nak ung ka no mi hmat lo khai ah kya ci. Mi ng’yak hlü gui mi gah vai ah m’taigü vai hlü ci. K’taigü ci cu mi mi gui Pa Khanpughü ah hlo mi kya lo tu hnging vai ah na chü gui ciah kya ci. Pa Khanpughü no kat nak be ciah k’chang gui a na k’phoin gui ah hlo ah mi mi gui na kat nak ci gui phih mi phon vai hlü ci.
Tuhngoi ng’yak ah ng’thu ni ung a van mi teng ba a kya ung maapi bäih ne Khanpughü ah ng’thu cu mi ghinlu pum mi hmat tu k’cang vai hlü ci lah mi mi k’taigü ung Khanpughü ah ng’yak hlü ah hlo ah m’lung m’yo nem nak, k’chang ah kat k’phon nak awn a ni ah Khanpughü yum tu k’cang ne k’taigü ne mi yak hlü gui mi shang ung a I phih mi gah hnging ci ci cu ng’thu k’ni no na m’thei m’cäi gui ciah kya ci.
