Yangon ahTamah saya gui ah ongoing formation htintan a mi khai ah mong
Yangon maanggo, Archdiocese ung om ci gui ah Tama saya gui no 2025, January k’cha 13 ung ka no 27 hngüp ah chüt hleih St. Peter and Paul phaya kyawng ung pngoing formation htintan khai ci gui ah kya ci. A cun ah htintan cu Boipahaya Hyginus Myint Soe no khawng mang hleih a mi bi ah kya ci. Htintan a mi kä mi leng pha ung khai tu khai gui ah tama saya gui am Boiphaya no a pyein cu “ na mi ng’thong ng’hlah vai shin ah htintan cu a k’ni ah na mi khai vai. Khawng mang k’chang gui ah kya ne Khanpughü ah mong lam na mi thähla vai, Khanpughü lah k’chang gui na mi m’hngi yei nak vai, na mi m’lung phih kyai, na mi kyähla phih kai gai ba khai ah na mi ci vai, yaica ci gui ung ka no a mi phyon lo ba vai ah na mi k’chü m’gein nak awn na mi gunghtot vai ci ne m’cäi gui ci.
A cun ah htintan cu Boi Yesu ah a hngu läk ne a thei m’cäi gui a k’ni ah thähla hnging vai, mät no mä hmat ne Khanpughü ung ka no gah ah letlawng cu däm lo pihti khai ah pyantham vai, Khanpughü no a na peit ah k’htagui keysu awn k’chang gui khawngmang ne a k’ni ah bi lo hnging pihti vai ah hnguhmgt nak gui ng’thei gah vail ah a k’hmo gui lah k’hmo k’tho gui chühlo tu gui ne khanpughü ah mong lam a k’ni ah m’thei m’thang gui hnging vai ah ng’ngahtüh ne a mi bi ah kya ci.
Trauma healing ng’thei nak ung ka no phih, tuhchü m’va kho ng’tukah nak ah phäh ah yaica nak gui buiawt ci gui ah k’chang gui I hlok cha gunghtot tu gui vai hnguh hmat nak vai gui phih a daa om ci ci ne Isbella Mu Hsar (the secretary of Archdiocesan Catechists) no pyein ci. A mi om nak hlak ah Parish ung om ne Khanpughü ah mong lam thähla ci gui ah tamah Saya gui cu tuhchü St. Peter and Paul phaya kyawng ung ng’thu k’ni khokum goi ng’thei pi ci gui ah kya ci.
A cun ah htintan ami kai nak ung Tamah saya 30 lo ciah kya ci. Mät no mät I hlok cha ng’ngaih thei vai ci cun phih hmat lo vai ci gui cun phih ng’thei ci gui ah kya ci.
A mi ng’thei yah ung a ng’htoi phäh phäh ah ng’ bum ne a cun gui ung ka a ni pi gui cun phih ghü ba ne ma lam ah a mi bi lo a shong lo pi hti vai ah pyang ci gui ah kya ci.
