Ng’thu k’ni ung om ciah m’vut m’cakang k’khan ah ng’hluk ah a mong

M’vut awn ng’hluk cu ng’thu k’phyüm ung leng ne ng’dang ciah kya ci. A caä Christian gui no kat nak a däm gui a bi ah phäh ah ng’yung’yon ba ne Wednesday hngüp ung k’chang a daa ah ma ah ng’dang khai ah m’vut awn a mi kyä pum m’vut awn ng’vum ne khaw k’hngüp 40 ung ng’yung’yon ba ne om ci leng man ci gui ah kya ci.

Catholic yumtu ng’bum ung m’vut awn ng’hluk ci cu, thüi hlei yah ung lah mät ah kat gui ah phäh ah ng’yu ng’yon ba yah ung bi ci cu om ciah kya ci. A caä cu a mi thüi hleih yah ung phih kyai, a mi kat nak gui ah phäh ah a mi ng’yuyon ba yah ung phih kyai a mi kyä pum m’vut awn ng’um ne ci man ci gui ah kya ci. Tuh chü läi cu m’cak’kang ung Crusu ng’dang khai ah hluk ne ta Boiphaya gui no a mi pyein cu “m’vut ung ka no na lo ciah kya hleih m’vut khui ah na htei na khai” ci ne pyein ci gui ah kya ci. Lent ah kya ciah kat nak ah phäh ah ng’yu ba ne k’taigü ne om yah ung khaw m’dek lam ah ta khanmopi lam a k’ni ah ng’ngahtüh vai hlü ci.

Khanpughü no  m’vut la ne hngün a pyan cu k’chang ah kya lo ci. (Gen 2:7) ciah mi ng’yak ah hlo ah mi mi ah kyä cu a I bo ng’hlui ung ka no kya lo ciah kä kya ci. A shäng hta diidam khai ah a kya a hlo ah shi nak cun phih om ci ci ah m’dang ciah kya ci. m’vut ci nak ci cu a ng’däih ah  kä dung khai ci ah ng’phlan ciah kya ci.