Bä ciah Peitru ah Palin ah poi
Bä ciah Peitru ah Palin ah poi cu 4 century ung Roma mango ung a mi leng ah kya ci. Palin ciah Chair ci nak ci cu a ng’thei ah bä ne thüngtai ci gui ah ngoh nak ah kya ci. A cun ah kya hleih bä ciah Peitru ah ngoh nak do ciah Papa Shangpughang a ngoh nak ah Chair cu htitheing ciah kya hleih (Holy Chair) a om nak ah Thanahchuk cun phih (Holy See) ci ne a mi pyein ah kya ci.
Bä ciah Petru ah Palin cu yumtu ng’bum a van ah k’khan ah Papa Shangpughang ah m’thei m’thang nak a bi nak hnging ah aa cu m’dang ciah kya ci. Papa Shangpughang cu yumtu ng’bum am yum vai ah thuk ciah mong gui a m’thei m’thang lo ung Palin ung ka no m’thei m’thang ciah kya ci. February k’cha 22 cu Roma mango ung bä ciah Peter ah yathu leng ne a mi do nak ah hngüp ah kya ci.
Galillee tuik’kam ung Boi Yesu noh bä ciah Peitru lah a ni k’däih ne do khai gui am m’theim’thang nak hnging ah aana cu pe ciah kya ci. Kei no ka pyein cu “Nang cu Peitru (Lung k’po) ah na kya ci. Shing ah lung k’po k’khan ah kei no ka ng’bum im( ätyop ciah k’chang ng’bum) ka hlüm lo khai. A cun ah ng’bum im cu shihkho gui no kä m’chüt khai gui. Khanmopi m’kot hmon nak phih nang am ka ning pe khai.
Khom’dek k’khan ah na khihkhon gui phung cu cu Khanmopi ah phih na khihkhon ah kya khai. Khom’dek k’khan ah na k’pyan na cha gui phung cu Khanmopi ah phih k’phyan chah tu ah kya khai” ci ne pyein ci. ( Mateu 16: 18-19) bä ciah Peitru ah hlo ah Papa Shangpughang gui cun phih bä ciah Peitru ah Palin ung ka no ngoh ghüt u ne Yum vai gui lah läk lam vai gui cu tugüt chüt hleih m’thei m’thang lä ci gui ah kya ci.
