Bä ciah Peter Damian ah ghinlu a mong

Bä ciah Peter Damian cu Christu kum 1007 ung Italy ghunkhaw, Ravena ung ng’tüi ciah kya ci. A hmo hta yah ge ung a nu lah a pa a ni ni k’hngih shih hleih a phäi na k’tu no k’chang hei täkphan k’chang vai hlü ah ci u ne vok gui vuh hlak ne phan ciah a phäi hta tumat awn a täng ah om ciah kya ci. A phäi tumat no a cun cu k’chü nga lo ne ca a ng’thei tu vai ah Peter Damian kyawng ah a that u ah kya ci. Ca a ng’thei tu ah ghinlu pum hnguh hmat nak ung ghuih ne be ciah k’chang tumat ah kya ci. A ni cu kyünhloi nak gui bi ne kat nak gui ah phäh ah a k’cum ah ng’yu ng’yon ba ne ng’hleih ng’mei k’htu ng’thuh ne yaica dudong ci gui am ngui ghui gui peitak gui ciah kya ci.

Duyai k’chang gui am a mät no ei ok nak ung m’bei gui ciah kya ci. A cun ung ka no kä shop ha hleih Peter Damian cu Fonte Avellana ung om ciah Benedict Yahteih kyawng un glut tu ne Kyawng uk ah kya lo ci. K’taigü nak, bi a kya ah bi nak lah bä ne htitheing ci gui cu ng’thei ng’thang bi lo nak ung a m’ung k’nga om kheng geng hleih, a k’chang gui am diimgei hleih düm hta ah biloh om k’ih gui ni, m’hngi nak lah m’lung m’yo m’nem nak gui m’thei m’thang gui ciah kya ci.

Christu kum 1057 ung Peter Damian ah gunghtot nak lah k’nga phlak na ng’ya hlü ciah Papa Shangpughang Stephen Ⅸ ah k’chü ng’ngai ne Ostia ah Taigü Maanggo lah Cardinal ah kya lo ci. Khokum a pi sho lo hleih Papa shangpughang a k’hngih nak (Alexanda Ⅱ) no a k’chü k’nga nak awn Yahteih ah kya ne a ghinlu Khanpughi am k’däih ne a gänap ba vai ah pyein hleih a cun ah om ba ciah kya ci. A ni cu kat nak a phäh ah ng’yu ng’yong ba ci gui ah kat mah gui am hngip hngäi  ne a k’ni ah k’bäi tu gui ne a mi m’lung kä ng’kyak ein vai a m’gong awn k’thagui pe gui ciah kya ci. Christu kum 1072,  ung Italy ghunkhaw, Faenza maanggo ung Shih ciah kya ci.