February k’cha a ghalei ät hnüp ung ng’yak vai mong
1Pharisee gùi lah Jerusalem aka lo ci gùi ah kchümcä̀ikshǜm gùi a mshah cu a mà ah ngbuum lo u ne 2 a hluläk a mshah no lèloi ca kut kä mshi ah ei èi u hleih hngu u ne pyéin gùi ci gùi. 3 A i ah kya hleih cii ung Pharisee gùi ni, Judaeu gùi van cu cá pùghǘpá gùi ah ci màn cu läk u ne kut kä mshi ah ei kä èi màn ci gùi. 4 Yoihtuknák aka ami lo ba ung phih tui kä ngshi ne ei kä èi màn ci gùi. Cun kòn ah ùm, k’am, dòòn, kphyà mshiikpyò ung lèng ne a hngei a kdá cii màn gùi ami läk om ci. 5 Cun ah kya hleih Pharisee gùi lah kchümcä̀ikshǜm gùi no “A i ah kya hleih na kchààng gùi no cá ngvái gùi ah cii màn kä läk u ne kä théing ca kut on ei èi ci gùi ang” ci ne ngshi ci gùi. 6 Bói no mshàng ba gùi ne a pyéin ba cu “Shin ah kchààng gùi no kei cu ami mgòng dǘt on na yèina ci gùi. Ami mlùng lä́i cu kei on a nghtéi ah hla ci,” cii ah Isaiah no nangmi ah ngshéi gùi ah mòòng cu kbüh khlä́m ne cengcä ci. 7 Ngami no kei ami na shùmchuk cu a khòghóng ah kya ci. A i ah kya hleih cii ung, ngami no kchààng ah biloh hloihlak gùi cu Kkhaanpùghǘ ah biloh vai hlǜ ah mtheimtháng ci gùi. 8 A i ah kya hleih cii ung, Kkhaanpùghǘ ah mtheimcä̀i gùi nong èin ne kchààng no a pyaan ah mtheimcä̀i biloh hloihlak gùi cu nami ngbahna khenggeng ci.” 9 Cun kòn ah ngami am a pyéin cu “Nami cii màn gùi cu nami läk vai ah phäh ah Kkhaanpùghǘ ah mtheimcä̀i cu mhloi thei ne nami ghot ci. 10 A i ah kya hleih cii ung, Moses no a pyéin cu “Na pá lah na nú na mhtéi goi vai.” Cun kòn ah “A núpá plah ci cu ngón vai,” ci ci. 11 Nangmi lä́i no “Pá am boh, nú am boh, ka ning péitták tu vai hlǜ te ah khoh-tang cu Corban ah kya pyi ci (Kkhaanpùghǘ am àp pyi) a cii ung 12 cun ah kchààng no a núpá kah vai a i a cii ba vai kä hlǜ ci,” nami ci ci.13 Nami läk màn gùi on Kkhaanpùghǘ ah kchü cu nami nong ci. A cun ah hlo a hngei a kdá cun phih nami bi ci.
Khanpughü ah m’thei m’cäi gui bäng ng’ngai ne läk vai. Yum tu k’chang tu mat ah phäh ah m’gong düt awn Khanpughü yum äp ah kä kya ein hkeih m’lung kyong ka no yum äp ne a pyein ah hlo ah om vai hlü ci ci cu mi ng’yak ciah kya ci.
