Bä ciah Jerome Emiliani ah ghinlu a mong
Somaschan Boiphaya ng’htoi m’düih ghüt ciah bä ciah Jerome Emiliani cu Christu kum 1486 ung Italy ghunkhaw, Venice maanggo ung ng’tüi ciah kya ci. A pa cu Jerome a k’hmo yah ung shih hleih, a khokum 15 ung gakap ng’ htoi un glut tu ciah kya ci.Hnguh hmat nak awn be ciah gakap poki ng’ vai ah kya hleih Treviso maanggo ung om ciah khaw m’htung ung Castelnuovo khantat ah a vai ah a mi hmoh ah kya ci.Treviso maanggo ga gui ah k’kaa ah a ng’kya kon ah a ni cu thong khui ung gon u ne m’shi gui awn chit ne a mi k’pon ah kya ci. Jerome cu thong khui kyawn ah a om yah ung a ni ah kä khin ka hleih a bi loh om kya gui man gui cu a k’ni ah ng’ngahtüh ba ciah kya ci. Nu Maria ah gunhtot nak awn thong khui kyawng ah ka no lut lo ba ne ta a ghinlu a van Khanpughü am gänap khai ah a m’lung phupit ciah kya ci. Bä ciah Jesrome cu a kho kum 37 ung Taigü Boi ah kya lo ne, a sham ko gui ah a khohtang gui a van duyai k’chang gui am peitak gui ciah kya ci.
Hmei hta kyawng gui, seiyung lah kä ni ci a mi bi nak ung ka no ng’yu ba ci gui ah k’hngumi gui a mi om nak vai im coh pe gui ciah kya ci. Christu kum 1532 ung Milan awn ng’et ciah Somascha maanggo ung Boiphaya ng’htoi m’düih ciah kya ci. A cun ah Boiphaya ng’htoi a m’düih cu, hmei hta gui m’htei vai, k’hmo k’tho gui hnguhmat nak gui a mi hlüngtai lo vai ah ca m’thei gui vai lah Boiphaya a mi kya lo tu hnging vai ah lam m’shüm gui vai ci ne a ng’ngaih nak awn a m’düih ah kya ci. Jerome no Boiphaya gui am a pyein man cu “ Boi Yesu no nang mi am dudong nak, m’lung ah a kyak nak, k’chang gui no kä ning tä gui ne a ning nong gui nak, cäiä nak gui lah k’chang gui no a I ah kä ning hnguh tu gui vai ah k’chitui awn ng’hluk gui ne Taigü ah ning kya hlak gui ci. Khanpughü tumat bäng no yaica buiawt gui ah mong hmat ci. Cun ung phih k’chang gui no a hmat cun phih mongk’thum om ciah kya ci.
Maapi bäih ne Khanpughü no nang mi cu a ni ah hta gui ah na mi kya lo vai ah a ning m’theing m’htaih nak gui kya ci. A k’hngih nak cu, Khanpughü no a ni bäng yum vai ng’yak hlü ci. A k’thum nak cu Khanpughü no mei k’kyawng ah om ciah ghui vai hlü ah a k’ni pi ah a ning pyantham ah kya ci. A cun ah yaca nak gui buiawt yah ung na yum nak a khäng ah a kya ung Khanpughü no nang am diimkyäp nak cu kho m’dek ah khan ah phih kyai, shih kon ah phih khai ning pei gui khai ci ne pyein ci. Christu kum 1537 ung poi nat nak ng’neng lo hleih a k’goi gui a m’htei yah ung a cun ah poi chawn nak shih ciah kya ci. Bä ciah Jerome cu hmei hta gui ghung m’htei ciah bä ciah k’chang tumat ah kya ci.
