February k’cha a hngüp (7) hngüp ung ng’yak vai a mong (Maku 6:14-29)
14 Yèisu a ngmìng tháng lo hleih Herod shangpùghang no ngya lo ne “Tuikphùm Yohàn shì ci gùi ungka ghǜng ba pyi ci. Cun ah kya ne aa mdáng ci,” ci ne pyéin ci. 15 A mshah no ani cu Elijah ah kya ci, a mshah no phih kcengshä̀ gùi ungka tumat kù ah tah kya ci,” ci ci gùi. 16 Cun ah mòòng cu Herod no ngya ne “A khngǘ ka tuk pit ah tuikphùm Yohàn ah kya ci. Shin ah kchààng cu shì ci gùi ungka ghǜng lo ba pyi ci,” ci ci. 17 Shangpùghang Herod no a nà Philippu ah kchú, Herodia cu gut ne om tu bapüi neta tuikphùm Yohàn cu pha hlak gùi ne thoong ung a chúm hlak gùi. 18 A i ah kya hleih cii ung tuikphùm Yohàn no “Na nà ah kchú na guh vai ah kä kya ci,” ci ne Herod am pyéin te ci. 19 Cun ah kya hleih Herodia no tuikphùm Yohàn cu ú ne ngón hlǜ ci. 20 Cun tu paang ah phih tuikphùm Yohàn cu kchààng kní ah a kya hmat ne Herod no mhtéi hleih kä ci hlot ci. Herod no tuikphùm Yohàn cu kyüh-à ne a pyéin phùng ngya neta i ah a cii vai kä hmat ba ci. A cun ung phih ani cu ngngài èi màn ci. 21 Cun kòn ah Herod no amät ami htánák ah khngǘp ung Galilee khò ung a ngvái gùi chü gùi ne a m’eim’ók tu gùi yah ung, 22 Herodia ah htá khnguumí htá cu lo ne nglààm hleih Herod lah a kkhin gùi cu yèi tu ci gùi. Cun kòn ah shangpùghang no khnguumí htá am “Na ngyákhlǜ na na shaan vai, ka ning pe khai” ci ne pyéin ci. 23 “Na shaan phùng cu ka khò a mcot ah a kya ung phih ka ning pe khai,” ci ah ngphyùn mah ne pyéin ci. 24 Kkhnguumí htá no a nú ah hteit ne “A i ka shaan vai ang,” ci ne ngshi hleih “Tuikphùm Yohàn ah lùkkè shààng ä” a ci. 25 A ktén ah dóng ba ne shangpùghang am “Shin ah dòòn ung tuikphùm Yohàn ah lùkkè mchäp ne na na péit vai ka ngyahlǜ ci,” ci ne pyéin ba ci. 26 Shangpùghang cu a kya ah thǜi tu láng ne phih a ngphyùn te ah phäh ah lah a kkhin gùi a kyüh-à gùi hlu ah kä dám hlǜ ne 27 “Tuikphùm Yohàn ah lùkkè lopüi ä,” ci ne a phàn ah kchààng tumat tǜi hleih a cun no thoong ah hteit ne Tuikphùm Yohàn ah lùkkè tupit ci. 28 Tuikphùm Yohàn ah lùkkè cu dòòn ung mchäp ne khnguumí htá am pe hleih khnguumí htá no phih a nú am thak ci. 29 Tuikphùm Yohàn ah kchààng gùi no phih cun ah mòòng cu ngya u neta lo ne a gók hteih bapüi ne kphuh ci gùi.
Yohan cu m’lung k’ni k’chang, k’chang k’bä tumat ah kya ne cang lam ung a I phih kä akk ein ne pyein hnging ciah kya ci. Cang lam a pyein ah phäh ah Herodia no k’u na ne a ngon hlak gui ah kya ci. Herodia ah ng’u k’sheih nak cu a ng’htei ah däm ciah kya ci. Shapughang David cun phih a mät ah m’lung ah yeikyai nak m’hlüng m’tai ne, a pyien püi te ah k’chü kha cu kä phloi hnging cang lam cu m’shung ne a leh cu mi hnguh ciah kya ci.
