Bä ciah Agatha ah ghinlu a mong

Bä ciah Agatha cu Christu kum 231 ung Italy ghunkhaw, Catani maanggo ung a ming thang ciah k’kyawngkhui ung ka no ng’tüi om lo ciah kya ci. A hmo hta yah ge ung tün ne a ghinlu khanpughü am a gänap ah kya hleih a I ah hlo ah k’chang gui no yum m’hngi tu u ne a mi beit ung phih a van dam ciah kya ci. A ni yum m’hngi tu ci gui ung ka tumat ah kya ciah Roma a mat Quintianus no yumtu ne om püi khai ah pyein hleih Agatha no a maa a phäh ah m’lung she ne, Agatha cu Christian tumat ah kya ci ci ne pyein ciah kya ci. Cun yah ung Christian k’chang gui cu yok’ka nak ne ngon ciah ah shangpughang Decius cu Roma manggo ung mang yah ciah kya ci. Agatha cu kä ni ci gui a mi bi nak ah im ngäng ci ah k’pa mi tu mat ah a mi khah püi ne a mi om hlak ah kya ci. Cung phih Agatha cu Khanpughü no ghung m’htei hleih a m’lung kä ng’thonghlat ein ne a yum nak ung khäng htek ciah kya ci. K’cha ät khe lo hleih Agatha ah kyä yün ne yok’ka dukdei nak ah set ung taih u ne, m’shi ng’koi awn a vun gui teek yop khai ah a mi gheh peit ah kya ci. A kyä pum m’ghüih ne yaica khai ah ci u ne ta a k’hngu ah a hluk a mi ah pit peit ah kya ci. A k’ghüp phli nak ung hman k’pi gui awn ng’con ci ah mei k’cak ah khan ah a plui ah a mi ng’le hlak ah kya ci. A cun ah yaica khai ah ci u neta thong kyong ah a mi ghon vai ah a mi khah lo ba püi yah ung Agatha noh a pyein cu “ kei na tüi pyang ciah Khanpughü aw, nang Boi cu shin ah khawm’dek ah m’hngi nak ung ka no na lo püi ne, k’chang gui ah yok’ka nak gui ka m’chüt hnging vai ah k’thagui na na peit ah kya ci. Kei ah ng’mü m’cha na do peit ä”. ci ne pyein ne ta shih ciah kya ci. A ni cu Christu kum 251, February k’cha 5 ung Italy ghunkhaw, Catani ung shih ci. Bä ciah Agatha cu goipyam ci gui m’htei ciah (Nurse) gui ghung m’htei ciah bä ciah k’chang tumat ah kya ci.