February k’cha a hngüp k’phli hngüp ng’yak vai mong (Mark 5:21-43)
21 Yèisu cu nghlekko on vaang kkàm ah hteit ba hleih ani ah kchààng a kdá ngbuum lo ci gùi. Yèisu cu pinle pèi ah om ci. 22 A cù yah ah Jairus ngmìngna ci ah cagàt ksheng cu lo ne Yèisu hngu ne a kho pèi ah ngbóp ne 23 “Ka htákhngu ngcét ci. Ani cu gái ba ne a ghün vai ah lo ne a kkhaan ah na kut taih lo ä,” ci ne nghuina ci. 24 Yèisu cu a hlu ah hteit tu hleih kchààng a kdá phih ngbuh tu kyu ne ngläk tu ci gùi. 25 Cun yah ung kum ghàleigoi púm, shi ngchot hleih ngkùùng ca khnguumí tumat om ci. 26 A khoh-tang ngpyi lo òng hleih yáica ne kchààng mgái kchààng a kdá ah ngkùh-ngmàn tu hleih phih kä ngmang ba ne kà lo pí te ca kya ci. 27 Yèisu ah mòòng cu ngya lo tu ne kchààng gùi ah nglùng, a hngú ah lo ne a hlui tòòn ci. 28 A i ah kya hleih cii ung, “A hlui htá dǘt ka tòòn ung phih ka gái ba khai,” ci ne pyéin ci. 29 A cu vai am a shi ngchot cu kik ci. A gái ba cu amät no hmat ci. 30 Yèisu no amät ungka aa a luh lo hmat neta kchààng gùi täng ah nghlat ne “Ka hlui a u no tòòn ci ang” ci ci. 31 A hluläk gùi no phih “Kchààng gùi no shin ah ning kbúi u hleih tah ‘A u na tòòn ci’ na ci ci,” ami ciinák tu ba. 32 Yèisu no phih tòòn ci cu a hnguh vai ah nghlat lo ne teng ci. 33 Cun ah khnguumí no amät ung kya ci cu hmat ne kyǜ ne cat ne a mà ah mkhúk dòòng ne a kya ah mòòng cu phleh ci. 34 Yèisu no phih “Ka htákhngu o, na yùm no ning mgái ba ci. A dììmkyäp ah hteit ä. Na mnehnák ungka phyòng ä,” ci ci. 35 Yèisu cun ah a kchü yah kshùùng ung cagàt aka lo u ne “Na htákhngu shi pyi ci. A i ah kya hleih Yèisu na yáica hlak líng ci ang” ciina ci gùi. 36 Ami pyéin cu Yèisu no ngya ne “Kä kyǜ èin ä. Yùm dǘt ä,” ci ne cagàt ksheng am pyéin ci. 37 Peitru, Yákùk lah Yákùk ah a nà Yohàn kòn ah a u phih kä ngläk tu hlak ci. 38 Cagàt ksheng ah im ah gok u hleih kpanmcai ne kyap ci gùi ni a kya ah mla ci gùi ni cu hngu ci. 39 A kkyòòng ah lut ne “A i ah kya hleih kpanmcai ne nami kyap ci ang. Kkhnguumí htá shi ca kä kya ci. Ip hngììm ci,” ci ne ngami am pyéin ci. 40 Ngami no phih Yèisu cu mlep ne gaih tu ci gùi. Ani no a kkyòòng ah om ci gùi avan a kpùùng ah tǜi èin gùi ne a khah lopüi gùi lah khnguumí htá ah a pá lah a nú mah ah khnguumí htá a ngyäännák ah hteit ci gùi. 41 Kkhnguumí htá ah kut vèn ne “Talitha koum,” ci ci. (Kkhnguumí htá o, let lo ä, nang am ka pyéin ci,” ci ne a pyéin hlǜ ah kya ci.) 42 Kkhnguumí htá cun phih a cu vai am let lo ne mkhaan ne hteit ci. Ani cu a khòkum ghàleigoi lo ci. A cun hngu tu ci gùi cu a kya ah cä́i ci gùi. 43 Cun ah mòòng cu a u am phih kä pyéin èin khai gùi ah mcä̀i gùi ne khnguumí htá am phih a ei vai péit hlak gùi ci.
A i phih m’chüt näng ciah a tung pi bäih, Hlüngtai pi bäih ci cu Khanpughü ah kya ci. K’chang gui no kä mi m’chüt kä mi ci hnging cu Khanpughü no a van ci hnging ci ci cu mi ng’yak ciah kya ci. Khanpughü ah k’chü m’gein nak gah ne m’kyä hla phih kyai, mi m’lung m’cha phih kyai a gai vai cu mi mi ah yum nak a k’ni ah a khänghtek vai lah a däm vai hlü ci.
