February k’cha a hngüp k”thum hngü ung ng’yak vai a mong
1Pinle tuinú vaang kkàm, Gerasenes ah gok u hleih 2 Nghlekko ungka a luh lo vai am kphuhhngün ungka nghlohnghngóm ca khòknget ah pha cu Yèisu on ngchúm ci goi. 3 Ani cu kphuhhngün khùi kkyòòng gùi ung om màn ci. A u no phih ani cu mshì gui on phih kä a khih hlot. 4 A i ah kya hleih cii ung ani cu khokhngòng kpánnák ni, mshì gui ni on a shä̀ngshä̀ng khit u hleih phih phupitpit ne ci hnget-hnget ci. 5 A mǜ a khngǘp kphuhhngün khùi kkyòòng ung boh, khòmhtuung ah boh om ne, mla ne amät no amät lung on át ne om ci. 6 Yèisu a lo cu khláng akano hngu ne a mà ah dóng lo shí ne ngbóp neta 7 “Hlǘng píkbäih ca Kkhaanpùghǘ ah htá Yèisu o, a i ni nglak om hleih ang. Kei kä na kkàlu èinnák vai ah Kkhaanpùghǘ ah ngmìng on ka ning nghuina ci,” ci ne a ngkhái ah shàlòng hleih mla ci. 8 A i ah kya hleih cii ung Yèisu no “Nghloh-hngóm ca nang khòknget, shin ah kchààng ungka lut lo ä,” ci ne a béit ah phäh ah kya ci. 9 Yèisu no “Na ngmìng a i ang” ci ne ngshi hleih “Ka ngmìng cu legion (khòknget ngnòng) ah kya ci. A i ah kya hleih cii ung keimi a kdá kami om ci,” ci ne pyéin neta, 10 amät ah khò ungka kä a ktä́m èin vai ah ni hleih nghuina ci. 11 Cun ah khòmhtuung pèi ah vok ngnòng ät ei èi ne lùùm ci gùi. 12 Khòknget gùi no phih Yèisu am “Cein ah vok gùi ung kami luh vai ah na tǜi gùi ä,” ci ne nghuina ci gùi. 13 Yèisu no phih luh hlak gùi hleih nghloh-hngóm ci ah khòknget gùi cu hteit ne vok gùi ung lut u hleih phyamkù vai lo ca vok ngnòng cu a kgái ah pinle tuinú ung ngphä̀i ne lut yop ci gùi. 14 Vok kshä́m gùi cu dóng ne gònú gùi lah pinle pèi k’om gùi am mthein tu gùi u hleih a i ah a kya cu teng tu vai ne lo ci gùi. 15 Yèisu ah gok lo u ne khòknget ah myáimca te cu ngò ne nghlùinghla ne, a kní ah a kya cu hngu u ne kyǜ ci gùi. 16 Hmat tu ci gùi no phih khòknget no a pha ah mòòng ni, vok gùi ah mòòng cu ngami am mthein tu gùi u hleih 17 ngami no ami khò ungka Yèisu a hteih ba vai ah lèng ne nghuina ci gùi. 18 Nghlekko kkhaan ah Yèisu kài hleih khòknget no a omnák te no amät on a m’om tu vai ah Yèisu cu nghuina ci. 19 Yèisu no kä yùm ci. “Na im ah lah na phä́inà pókchààng gùi ah hteit ba ne a i hlòk ah Kkhaanpùghǘ no kchǜkhngà ci ah mlùng on nang kah vai bi a bi cu mthein tu gùi ä,” ci ci. 20 Ani phih hteit ne amät no a i hlòk ah a gah ah mòòng cu a cù yah ung lèng ne avan ung pyéin hleih kchààng van no cä́i ne mnài ci gùi.
Khawget ah m’diidam toktap nak cu k’chang gui ah ghinlu ung tumat bäng hmät bäng ah kä kya hleih a daa mi hnguh hnging khai ah kya ci. Cun tu bang ah phih mi mät no kä mi mchü näng ah toktap nak gui m’chüt näng hnging ciah a i phih m’chü näng ciah Khanpughü tumat om ci ci cu m’ yumäp ne Boi am mi mi gui ung hlü ciah ah k’thagui cu a cum ah mi shan hnging ung Khanpughü no kä na nong gui düt ci ci cu mi ng’yak ciah kya ci.
