Bä ciah John Bosco ah ghinlu a mong (1815-1888)

Salasian Boi Phaya ng’htoi m’düih ciah bä ciah John Bosco cu Christu kum 1815 ung  Italy ghunkhaw ung dudong pakya k’kyawng khui ung ka no ng’tüi lo ciah kya ci. A khokum (9) ung a mang she lo ne, bung k’om chihla ng’bum tumat cu maa ne ghatghum ciah a thong ng’hlah nak ung ka no a k’hngu ah hngiphngäi hta ciah hto me hta gui ah a kya lo ci gui ah ng’ mang nak ciah kya ci. Nu Maria no a ni ah lu khan ah a kut taih ne shing ah chihla ng’bum gui a mi ng’thong hlah lo na hnguh ah hlo ah shin ah maanggo ung om ciah a k’hmo k’chang gui na pyantham vai ci hleih, a cun ung ka no leng ne a hmo gui k’bum gui ne, ng’thu k’ni m’thei gui ne, Phaya kyawng ah phih khah püi gui ne ci ciah kya ci. Christu kum 1835 a khokum 16 ung Chieri maanggo ung om ciah Seminary ung lut tu ci. Christu kum 1841 ung Taigü mang ah kya lo ne Italy ung om ciah Turin maanggo ung Khanpughü ah mong lam gui bi ciah kya ci. A cun ah maanggo ung thongkhui ung om ciah hmo k’tho gui awn lam k’khan ah om ciah duyai ci gui ah a hmo hta gui ka vai bi a täng ah bi pui gui ciah kya ci. A hmo hta gui am hnguh hmat nak lam ca m’thei gui ne Christian ah ghinlu lah läk lam vai gui a mi hnguh hmat nak a mi ng’thei ng’thang nak hnging vai ah St. Fracis de sails kyawng m’düih ciah kya ci. A ni cu bä ciah k’chang tumat ah hngiphngäi cu yumnai ne läk ciah kya ci. A ni ah kä bongbai hnging ah Khanpughi ah mong lam a bi nak ung a nu Margaret no a däih ah gunghtot ne m’tam ciah kya ci. Ghungkhaw k’hmo gui lang ciah ghinlu ung a mi om hnging vail ah ni ciah Christian a mi kya lo vai a bi loh nak vai ah Don Bosco noh Shoes khoduk bi nak lah hlui hlak gui chui nak gui ah bi loh nak gui cun phih leng pe gui ciah kya ci. Christu kum 1859 ung hmo k’tho gui gunghtot khai ah Salasian Taigü ng’htoi m’düih ne, Christu kum 1872 ung the daughter of Mary help of Christian Marmah ng’htoi cu m’düih ciah kya ci. Bä ciah John Bosco cu Christu kum 1888, January k’cha 3, a khokum 72 ung shih ciah kya ci.