K’kyawngkhui ung Buiawt gui, cäi ng’ä gui lah yaica nak gui

K’kyawngkhui a m’shah ung m’hngi nak ci cu capyit tui vai hlü ah kya hleih mi hnguh khai ah kya ci. Capyit tui ci nak ci cu a k’sho tha ung ni lo lei lei ci ah capyit tui gah ah kya ci. A cun ah hlo ah k’kyawngkhui ma gui cun phih a hngüp täi yaikya buiawt gui ng’lak ah tumat no tumat hmat thei ne, m’lung m’yonem nak kon tumat no tumat a ghinlu a gän ap gui no a sho lo ung ngani ah k’kyawngkhui cu khänghteik hlak ne a ni bi loh gui ung ng’shunghei hlei yeikyai ne a täng ah om hnging khai goi ah kya ci. Tumat no tumat htitsa a ni om nak ung m’ung a ng’shäi vai lah a ni ma lam ah ng’ngaih u nak a om vai hlü ci. Nga ni ah yaikya buiawt gui ah phäh ah a ni tüi hlei gui cu khokum a sho lo ung ng ani ah yei kyai nak ah hta hmo gui ah ng’thonghlat lo hnging khai kya ci. St. John of the cross no a pyein cu “ ng’yum hngi ci gui ah k’chang gui cu maapi bäih ne thüi hlei yaikya nak gui buiawt khai gui. A cun gui a päng kon ah vah nga mi cu a k’cang ah ng’yumhngi ci gui kya lo khai” ci ne pyein ci. Nga mi ah ng’yum hngi nak cu a k’phung ah kä ng’dang tu lang pang hleih phih, kho kum a k’sho a mi m’lung kyawng ah thuk hleih a mi htin ah tui hta ciah capyit tui cu awk pi ci gui a kya ci. A cun ah hlo ah kya ciah ng’chu ng’la goi cu yaica buiawt gui kä kyüh ein ne, a cun gui m’chüt vai ah tumat no tumat gunghtot ne k’pe ci goi ah kya ci.