A-hlu-läk gùi-ah ng’dáng bà ci.
Khaw hngüp k’chüih-ung-kah, a k’htük hngüp mü hngün-ah, Judeu k’chàng gùi ami kiüh-ah phäh-ah, a-hlu-läk gùi nawh ami omnák-ah im ung k’shoh khai neh ng’üng ci gùi. Jesu cuh, lo neh ngamí-ah ng’lùng-ah ng’düí nehtah, “Nangmí dìm kiäpnák nawh ning om püi gùi hlä,” ci ci. Cun-ah piéin nehtah akut goi lah, avé cuh, k’hmuh tu gùi ci. A-hlu-läk gùi nawh phih, Báwi cuh, hnguh lo u neh a kia-ah zèi tu ci gùi. Leng bà neh Jesu nawh, “Nangmí gùi ung dìm kiäpnák om hlä,” Pá nawh, kei cuh, a na tüih-a hlo-ah, kei nawh ka ning tüi gùi ci,” ci ci. Ngami gùi-ah k’khãn ah muh neh, “Htí-théing ci-ah Muh cuh, gah vä. Nangmi gùi nawh, kat nami m’hlòt péit gùi ung lòt khai gùi. Kat nami tang péit gùi läí cuh a cu ng’tang-ah, kat ung om khai gùi,” ci neh Jesu nawh piéin ci.
Jesu a lo zah ung a-hlu-läk gùi gha-leigoi-ung-kah Didimus (a k’hnga ng’gúm/a ng’phì) ci-ah, Htomas cuh ngami gùi awn kä om tu ät ci. A hei a-hlu-läk gùi nawh, “Báwi kami hnguh bà ci,” ci neh m’thein tu u hleih Htomas nawh, “Akut goi ung m’si k’hmà kä ka hnguh ung lah, m’si k’hmà ung kakut piang kä ka m’hluh ung a vé-a phih kä ka k’poh ung kä ka zùm khai néi,” ci neh m’sàng bà gùi ci. Hngüp chéit ng’laknák chü-tah Jesu-ah a-hlu-läk gùi cuh Htomas mah zah, im ’kiòng-ah ng’üng bà mä ci gùi. K’Shoh khai u hleih phih, Jesu cuh, lut lo neh ngamí-ah ng’lùng-ah ng’düí nehtah, “Nangmí, dìm kiäpnák nawh ning om püi gùi hlä,” ci neh piéin ci. Cun kon-ah, Htomas àm piéin neh, “Nakut-piang sin-ung m’hluh neh kakut goi sih, teng-ä. Nakut na pé-ä. Ka vé k’pók-ä. Kä zùm neh kä kia-ä. Zùm-ä,” ci ci. Htomas nawh, “Ka Báwi, ka Khãnpùghí,” ci neh m’sàng ci. Jesu nawh phih, “Kei na hnguh neh nà zùm ci. Kä na hnguh láng neh phih zùm ci gùi cuh bä ci gùi,” ci neh piéin ci. Jesu nawh, a-hlu-läk gùi-ah mà-ah a bi-ah cäí vai-ah a màwng gùi cuh sin-ah cã-üp ung kä guk tu, a hei a k’dá om bà ci. Cun ung phih, Jesu cuh Khãnpùghí-ah htá, Christù Báwi-ah a kia, nami zùm vai lah, zùm u nehtah ani-ah ng’ming awn, nami ghin tu vai-a phäh-ah, guk-ah kia ci.
